ھىزبۇللا ئىسرائىلىيىنىڭ خايفا شەھىرىگە راكىتا ئاتتى، ئىسرائىلىيە بېيرۇتنى بومباردىلىدى

لىۋاندىكى ھىزبۇللا قوراللىق پىدائىيلىرى يەكشەنبە كۈنى ئىسرائىلىيىنىڭ شىمالىدىكى خايفا شەھىرىگە راكىتا ئاتتى. بۇنىڭ نەتىجىسىدە ئاز دېگەندە 8 كىشى ئۆلدى. بۇ ئارىدا ئىسرائىلىيە دائىرىلىرىمۇ لىۋان پايتەختى بېيرۇتتىكى بومباردىمان ھەرىكىتىنى داۋاملاشتۇردى.

ھىزبۇللا تەرەپ خايفادىكى بۇ ھۇجۇمنىڭ ئىسرالىيىنىڭ لىۋاندىكى خەلقلەرگە كەلتۈرۈپ چىقارغان زىيانكەشلىكلىرى بەدلىگە قىلىنغانلىقىنى ئەسكەرتتى. ھىزبۇللا ئىسرائىلىيىنىڭ 3‏-چوڭ شەھىرى بولغان خايفا شەھىرىگە ئاز دېگەندە 20 راكىتا ئاتقان. ئۆلگەن 8 كىشىدىن باشقا يارىلانغانلارنىڭ سانىمۇ 20 دىن ئاشقان.

ئىسرائىلىيىنىڭ لىۋاندىكى ھۇجۇمى، ھىزبۇللا قىسىملىرىنىڭ 2 نەپەر ئىسرالىيە ئەسكىرىنى تۇتقۇن قىلىشى ۋە 8ئىنى ئېتىپ ئۆلتۈرىشى بىلەن باشلانغان بولۇپ، ھازىرغىچە لىۋاندا 112 كىشى ئۆلگەن. لىۋاننىڭ خوشنا دۆلەتلىرىدىن ئىران بىلەن سۈرىيە ئارقا-ئارقىدىن ئىسرائىلىيىنى پۇرسەتتىن پايدىلىنىپ ئۇلارغا ھۇجۇم قىلماسلىققا ئاگاھلاندۇردى. (پەرىدە)