Истанбулда намайиш йүз бәрди


2007.04.29
Share on WhatsApp
Share on WhatsApp

Йәкшәнбә күни түркийиниң истанбул шәһиридә бир қанчә йүз миң киши қатнашқан кәң көләмлик намайиш йүз берип, бу дөләтниң әнәнилирини давамлаштурушни тәләп қилди.

Бундақ намайишлар икки һәптиләрдин буян давамлишиватқан болуп, намайишчилар дөләттә исламий әнәниләргә садиқ болған һазирқи һөкүмәткә наразилиқ билдүргән һәмдә сиясәт билән дин айрилған түзүмни давамлаштурушни қоллайдиғанлиқлирини билдүрүшкән. 27-Април күнидики президент сайлимида һазирқи һакимийәттики адаләт партийисидин келип чиққан ташқи ишлар министири абдулла гүл толуқ беләткә еришәлмигән. Бу қетим өктичи җумһурийәт хәлқ партийиси, ана вәтән партийисигә тәвә көплигән парламент әзалири беләт ташлашқа қатнашмиған. Түркийә һәрбий даирилири исламчилиқни әйибләп, түркийиниң һөкүмәт билән динни айрип башқуруш түзүмини қоғдайдиғанлиқини тәкитлигән.

Әнгилийә б б с агентлиқиниң учуриға асасланғанда, бир нәпәр түркийә һәрбий рәһбири бу дөләтниң қораллиқ күчлириниң түркийиниң әнәниви тәртиплириниң күчлүк қоғдиғучиси икәнликини унтуп қалмаслиқни тәкитлигән, һөкүмәт баянатчиси армийәниң баш министирниң буйруқиға бой сунуши керәкликини әскәрткән.

Бирақ, ташқи ишлар министири абдулла гүл буниң билән өзиниң президентлиқ намзитидин ваз кәчмәйдиғанлиқи һәм уни сақлайдиғанлиқини тәкитлигән. Адаләт партийиси ислам диний арқа көрүниши бар партийә дәп қариливатқан болуп, әгәрдә абдулла гүл ғәлибә қилса, у түркийиниң тунҗи исламий идийидики партийидин келип чиққан президенти болуп қалидикән. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.