Amérika xitayning bash kötürüshige taqabil turush istratégiyisi belgilishi kérek

Amérika dölet mejlisining qarmiqidiki bir tekshürüsh komitéti charshenbe küni dölet mejlisige yilliq doklatini sunup, amérikini xitayning bash kötürüshige taqabil turush istratégiyisini békitip chiqishqa chaqirdi.

Amérika- xitay iqtisad we bixeterlik munasiwitini tekshürüsh komitéti doklatida, " amérika we xitay , kelgüside choqum qoralliq tirkishishi natayin bolsimu, emma amérika, nurghun jehette ikki döletning oxshash bolmighan menpe'et , muddi'a we qimmet qarishi barliqini tonup yétishi kérek" dep bildürgen. Ular amérikining xitayning iqtisadiy we herbiy jehettin bash kötürüshige qarita, omumiy bir istiratégiyige ige emeslikini körsitip, amérika dölet mejlisige bir yürüsh tekliblerni otturigha qoyghan.

Mezkur komitét, bixeterlik jehettin amérikining tinch okyan rayonidiki herbiy küchini ashurushni oylishishi kéreklikini, iqtisadiy jehettin, xitaydin import qilinidighan mallardin élinidighan bajni ashurushni oylishishi kéreklikini bildürgen.

Mezkur komitét yene, xitay hökümitining éntérnétte söz erkinlikini boghushini tenqid qilip, dölet mejlisining küch chiqirip, xitayda tijaret qiliwatqan amérika shirketlirining xitayning söz erkinlikini basturush meshghulatigha qatnishishining aldini élishini otturigha qoyghan.

Amérika - xitay iqtisad we bixeterlik munasiwitini tekshürüsh komitétining asasliq wezipisi, ikki döletning soda munasiwitining amérikining bixeterlikige élip kélidighan tesirini bahalap, bu heqte her yili dölet mejlisige tekshürüsh doklati sunushtin ibaret. (Arzu)