Berluskoni xitay komunistlirini ghezeplendürdi

Italiye bash ministiri silwiyo berluskonining komunistlargha nepret oquydighanliqini we xitayda bowaqlar pishurulup oghut qilin'ghan, dégen sözliri xitay da'irilirining ghezipini qozghidi.

Xitayning rimda turushluq bash elchixanisi seyshenbe küni bayanat élan qilip, "silwiyo berluskonining muwapiq bolmighan sözliridin qattiq ghezeplen'genlikimizni bildürimiz," dep körsetti. Shuning bilen birge "italiye rehberliri herikiti we sözide junggo - italiye munasiwitining muqimliqi we tereqqiyatigha diqqet qilishi kérek" dep eskertti.

Berluskonining xitay heqqidiki bayanliridin kéyin italiye tashqiy ishlar ministirliqi bayanat élan qilip, bash ministirning sözliri "ötmüshtiki weqelerge qaritilghanliqini" we berluskonining xitayni ghezeplendürüsh niyiti yoqliqini bildürgen.

Italiyide 9 - we 10 ‏- april künliri parlamént saylimi élip bérilidu. Berluskoni italiye sol qanat küchlirining rehbiri romano prodi bilen saylam riqabiti élip barmaqta. Romano prodi berluskonining xitay heqqidiki sözlirini eyiblep, " bu xitaydiki 1 milyard 300 milyon xelqning achchighini keltüridighan sözler", dédi.

Emma berluskoni, " ular méni kommunistlar bowaq yigen dédi, dep eyiblewatidu. Emma kommunizimning qara kitabini oqusingiz junggoda mawning dewride bowaqlarning oghut qilinip étizgha chéchilghanliqini bilisiz," dep körsetti. U, seyshenbe küni italiye téléwiziyiside " méning dégenlirim buningdin 50 yil burunqi ishlar. Bu ret qilghili bolmaydighan tarixiy pakitlar " deydu.(Erkin)