Amérika 3 neper amérikiliq xitayni axbarat oghrilash bilen eyiblidi

Amérikining fédéral zastatillar ömiki bir amérikiliq xitay énzhinéri bilen uning ikki tughqinini axbarat oghrilash bilen eyiblidi. Mezkur eyibleshte, 62 yashliq mey daji we uning ayali hem inisi bilen birlikte amérika déngiz armiyisining paraxotlirigha a'it uchurlarni xitaygha yetküzgenliki yézilghan.

Amérika birleshme agéntliqining amérika fédéral emeldarlirining sözini neqil keltürüshiche, mey daji amérika déngiz armiye paraxotlirini ilgharlashturush tetqiqati üstidiki sezgür programmining bash inzhinéri bolup, u bu yerdin sezgür axbaratlar qachilan'ghan kompyutér diskisini oghrilap chiqqan. Andin uning 62 yashliq ayali jaw lixu'a bu disikni CD gha köchürüp, uni mey dajining 56 yashliq inisi mey daxonggha bergen.

Amérika fédéral tekshürüsh idarisining melum qilishiche, mey daxong 10 - ayning 28 - küni ayali bilen birlikte xongkonggha baridighan béletni élip qoyghan bolup, u yene gu'angjugha bérip shu yerdiki alaqilishidighan kishiler bilen körüshüshke teyyarlan'ghan iken.

Buninggha qarita, amérika fédéral sot mehkimisi ularni hökümet te'elluqatini oghrilighan we oghrilan'ghan nersilerni yötkeshke qatnashqan, shundaqla jasusluq qilish jinayetliri bilen eyiblidi. Ular üstide yene dawamliq sot échilmaqchi. (Peride)