ئامېرىكا خىتاينىڭ ئۈچ شىركىتىگە جازا بەردى


2004-12-02
Share

ئامېرىكىنىڭ خىتايدىكى ئەلچىخانىسى پەيشەنبە كۈنى، 3 خىتاي شىركىتى ۋە بىر خىتاي پۇقراسى ئامېرىكىنىڭ، قورال ماتېرىياللىرىغا مۇناسىۋەتلىك بويۇم ۋە تېخنىكىلارنى ئىرانغا ساتماسلىق چەكلىمىسىگە خىلاپلىق قىلغانلىقى ئۈچۈن، ئامېرىكا ھۆكۈمىتىنىڭ ئۇلارغا جازا بەرگەنلىكىنى بىلدۈردى.

ئامېرىكا بىرلەشمە ئاخبارات ئاگېنتلىقىنىڭ خەۋەر قىلىشىچە، ئامېرىكا ئەلچىخانىسى گەرچە بۇ خىتاي شىركەتلىرىنىڭ ئىرانغا قانداق بويۇملارنى يەتكۈزگەنلىكى توغرىسىدا تەپسىلىي توختالمىسىمۇ، ئەمما بۇ بويۇملارنىڭ ئىراننىڭ ئۇزۇن مۇساپىلىق باشقۇرۇلىدىغان بومبا، يادرو قوراللىرى ۋە خىمىيىلىك قوراللارنى تەرەققىي قىلدۇرىشىغا پايدىلىق ئىكەنلىكىنى كۆرسەتتى.

خىتاي تاشقى ئىشلار مىنىستىرلىقى خىتاينىڭ بۇ جازاغا قەتئىي قارشى تۇرىدىغانلىقىنى بىلدۈرۈپ، خىتاي ھۆكۈمىتىنىڭ كەڭ كۆلەمدە يوقىتىش خاراكتېرلىك قوراللارنىڭ تارقىلىشىنى چەكلەش ۋە كونترول قىلىشتا ئىزچىل تۈردە ئۈنۈملۈك چارىلەرنى قوللىنىپ كەلگەنلىكىنى تەكىتلىدى.

ئامېرىكا ئەلچىخانىسىنىڭ باياناتچىسى سۆزىدە يەنە، جازالانغان ئۈچ خىتاي شىركىتى ۋە بىر خىتاي پۇقراسىنىڭ ئامېرىكا بىلەن سودا قىلىشى چەكلىنىدىغانلىقى، شۇنداقلا يەنە، ئېكىسپورت رەسمىيىتىنى تەلەپ قىلىدىغان ئامېرىكا ماللىرىنى سېتىۋېلىشنى ئىككى يىلغىچە چەكلەيدىغانلىقىنى بىلدۈرگەن.

بۇنىڭ بىلەن ئامېرىكا ۋە خەلقئارانىڭ ئىران ۋە پاكىستان قاتارلىق دۆلەتلەرگە قورال تېخنىكىسىنى سېتىپ بەرمەسلىك چەكلىمىسىگە خىلاپلىق قىلغانلىقى سەۋەبىدىن ئامېرىكا ھۆكۈمىتى تەرىپىدىن جازالانغان خىتاي شىركىتى ۋە پۇقراسىنىڭ سانى 28 گە يەتتى. (پەرىدە)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت