ئامېرىكا ھۆكۈمىتى يېقىندا خىتاينىڭ يەتتە شىركىتىنى ئىرانغا "بالىستىك بومبا ۋە كەڭ كۆلەمدە قىرغىنچىلىق يۈرگۈزۈش خاراكتېرلىق قورال تېخنىكىسىنى سېتىپ بەرگەن" دەپ ئەيىبلەپ، ئۇلارغا ئىقتىسادىي جازا يۈرگۈزدى.
فرانسىيە ئاخبارات ئاگېنتلىقىنىڭ خەۋىرىگە قارىغاندا، ئامېرىكا تاشقى ئىشلار مىنىستىرلىقى ئۇلارنىڭ تىزىملىكىنى بۇ ئاينىڭ باشلىرى ئېلان قىلغان. ئامېرىكا ھۆكۈمىتى، ئىرانغا بالىستىك بومبا تېخنىكىسى سېتىپ بەرگەن شىركەتلەر بىلەن سودا قىلماسلىق ھەققىدىكى قانۇنىغا ئاساسەن، مەزكۇر خىتاي شىركەتلىرىنىڭ ئامېرىكىدا سودا قىلىشىنى چەكلىگەن.
خىتاي تاشقى ئىشلار مىنىستىرلىقى بۇ مۇناسىۋەت بىلەن سەيشەنبە كۈنى بايانات ئېلان قىلىپ، ئامېرىكىنىڭ ئەيىپلىشىنى "ھېچقانداق ئاساسى يوق" دەپ بىلدۈردى. ئۇ باياناتىدا، "بىز خىتاينىڭ كەڭ كۆلەمدە قىرغىنچىلىق يۈرگۈزۈش خاراكتېرلىق قوراللارنىڭ تارقىلىشىنى چەكلەش قانۇنىغا خىلاپلىق قىلغان شىركەتلەرنى چوقۇم قاتتىق جازالايمىز" دەپ كۆرسەتتى.
خەۋەرگە قارىغاندا، ئامېرىكا ھۆكۈمىتى بۇ قېتىم خىتاينىڭ يەتتە شىركىتىدىن سىرت، يەنە تەيۋەن ۋە شىمالىي كورىيىنىڭ ئىككى شىركىتىگىمۇ ئىقتىسادىي جازا يۈرگۈزگەن.(ئارزۇ)