Б д т кишилик һоқуқ комитетиниң тәнқид вә талаш- тартиштики җәнвә йиғини ахирлашти

Б д т кишилик һоқуқ комитетиниң җәнвәдики йиллиқ йиғини, өз ролини йоқитиш тоғрисидики тәнқидләр шундақла ислаһат чақириқи астида җүмә күни ахирлашти. Кишилик һоқуқ комитетиниң бу йилқи йиғини, блрусийә, куба, шимали корийә, вә бермиларни тәнқидлигән болсиму, суданниң дарфур районидики инсанпәрвәрлик кризисини әйибләйдиған бирла қарар мақуллиди.

Б д т баш катипи кофи аннан, йиғинда б д т ниң кишилик һоқуқни қоғдайдиған күчлүк бир органға муһтаҗлиқини билдүргән. У, " кишилик һоқуқ комитети ишәнчилик дәриҗисини йоқутуп, б д т ниң инавитигә көләңгә чүшүрди," дәп көрсәтти. Аннанниң тәкитлишичә, хәлқара һөрмәткә игә йеңи орган қурушниң вақит саити келип қалған.

Б д т ниң кишилик һоқуқ комисари лойис арбор, " қурулғуси комитетниң шәкли, қурулмиси шундақла һоқуқи һазирқидин пәрқлиқ болуши керәк," дигән. Бу қетимқи йиғинда терорчилиқни баһанә қилип, кишилик һоқуқни дәпсәндә қилған дөләтләрни тәкшүрүш гурупписи қурулди, әмма бу гуруппиниң тәкшүрүш нишани чечийә, хитай вә зимбабувиларни өз ичигә алмиған. Бирләшмә ахбарат агентлиқиниң хәвәр қилишичә, мәркизи ню - йорктики кишилик һоқуқни көзитиш тәшкилатиниң мудири кәннис рос, " кишилик һоқуқ комитети суданға охшаш дөләтләр паналинидиған мусапирхана болуп қалди," дәп әйиблигән. Кишилик һоқуқ комитетидики хитай, зимбабуви, куба, непал вә русийә қатарлиқлар кишилик һоқуқни дәпсәндә қилиш билән әйиблиниватқан дөләтләр иди. (Әркин)