B d t kishilik hoquq komitétining tenqid we talash- tartishtiki jenwe yighini axirlashti

B d t kishilik hoquq komitétining jenwediki yilliq yighini, öz rolini yoqitish toghrisidiki tenqidler shundaqla islahat chaqiriqi astida jüme küni axirlashti. Kishilik hoquq komitétining bu yilqi yighini, blrusiye, kuba, shimali koriye, we bérmilarni tenqidligen bolsimu, sudanning darfur rayonidiki insanperwerlik krizisini eyibleydighan birla qarar maqullidi.

B d t bash katipi kofi annan, yighinda b d t ning kishilik hoquqni qoghdaydighan küchlük bir organ'gha muhtajliqini bildürgen. U, " kishilik hoquq komitéti ishenchilik derijisini yoqutup, b d t ning inawitige kölengge chüshürdi," dep körsetti. Annanning tekitlishiche, xelq'ara hörmetke ige yéngi organ qurushning waqit sa'iti kélip qalghan.

B d t ning kishilik hoquq komisari loyis arbor, " qurulghusi komitétning shekli, qurulmisi shundaqla hoquqi hazirqidin perqliq bolushi kérek," digen. Bu qétimqi yighinda térorchiliqni bahane qilip, kishilik hoquqni depsende qilghan döletlerni tekshürüsh guruppisi quruldi, emma bu guruppining tekshürüsh nishani chéchiye, xitay we zimbabuwilarni öz ichige almighan. Birleshme axbarat agéntliqining xewer qilishiche, merkizi nyu - yorktiki kishilik hoquqni közitish teshkilatining mudiri kennis ros, " kishilik hoquq komitéti sudan'gha oxshash döletler panalinidighan musapirxana bolup qaldi," dep eyibligen. Kishilik hoquq komitétidiki xitay, zimbabuwi, kuba, népal we rusiye qatarliqlar kishilik hoquqni depsende qilish bilen eyibliniwatqan döletler idi. (Erkin)