Rim papasi jon pa'ul 2 alemdin ötti

30-Mart küni, rim papisi jon pa'ul 2 watikanda étiqadchilargha bext tilimekte. AFP

Rim papasi jon pa'ul 2 shenbe küni kechte 84 yéshida alemdin ötti. Watikan da'iriliri buning bilen toqquz künlük matem pa'aliyetlirini bashlidi.

Gherb metbu'atlirining xewirige qarighanda, dunyaning her qaysi jayliridiki katolik muritliri we rim papasi jon pa'ul 2 ning rohidin ilham alghan nurghun kishiler uning ölümige her xil yosunda teziye bildürüshti. Nechche on minglighan kishiler yekshenbe küni rimdiki san pitir chérkawining aldidiki meydan'gha yighilip, 1978 - yilidin buyan katolik muritlirigha yitekchilik qilip kéliwatqan pa'ulshaliq papa jon pa'ul 2 ge teziye bildürdi.

Shuning bilen bir waqitta, her qaysi döletlerning rehberlirimu rim papasi jon pa'ul 2 ning meniwiy we exlaq jehettiki yitekchilik roligha we uning pa'ulsha hemde sherqiy yawrupaning bashqajayliridiki kommunistik hakimiyetni tinchliq bilen aghdurushta oynighan ijariy roligha minnetdarliq bildürdi we medhiye oqudi.

Amérika prézidénti jorj bush, "bu dunya insaniyet erkinlikining bir chimpiyonidin ayrildi" dep bildürdi. Girmaniye bash ministiri shirodér " jon pa'ul 2 özining herikiti we ésil xisliti bilen bu dunyani özgertti" dédi.

Rusiye prézidénti wiladémir putin " rim papasi qaldurup ketken meniwi we siyasiy miraslar dunya tarixida muhim orunda turidu" dep körsetti. Pelestin milli hökümitining re'isi mexmud abbasmu rim papasining pelestinning erkinliki we musteqilliqini qoghdash üchün tirishchanliq körsetkenlikini medhiylidi. Isra'iliye da'iriliri bolsa, "rim papasi barliq dinlar arisida köwrüklük rol oynidi" dep bildürdi.

Buningdin sirt, tibetning diniy dahisi dalay lamamu rim papasi jon pa'ul 2 ning ölimige özining chongqur teziyisini ipadilidi.

Xewerlerge qarighanda, rim papasi jon pa'ul 2 ning depne murasimining éniq waqti téxi békitilmigen bolup, biraq rim da'iriliri depne murasimida ikki milyon ademni kütüwélishqa teyyarliq qilmaqta iken. (Arzu)