Диний кәмситишму яки ахбарат әркинликиму ?


2006-02-02
Share

явропадики бәзи гезитләрдә муһәммәд пәйғәмбәрниң юмурлуқ картун рәсимлири бесилғандин кейин, бу ислам әллириниң күчлүк наразилиқини қозғиди. Бу рәсимни " франсийә кәчлик гезити" дә басқан баш муһәррир пәйшәнбә күни вәзиписидин елип ташланди.

Хәвәрләргә қариғанда , бәзи ислам әллиридә "франсийә кәчлик гезити" ни тарқитиш чәкләнгән. Картун рәсим тунҗи қетим данийидики бир гезиттә елан қилинғандин кейин, норвигийә, франсийә, германийә, испанийә вә италийә қатарлиқ дөләтләрдә бәзи гезитләр бу рәсимни көчүрүп басқан иди.

Сәуди әрәбистан билән сүрийә данийидә турушлуқ баш әлчисини чақиртивалди. Ливийә копинхагендики әлчиханисини тақиған. Бәзи ислам әллиридә данийә маллириға байқут елан қилинди. Мусулманлар явропа гезитлириниң һәрикитини мусулманларға қаритилған һөрмәтсизлик, дәп қаримақта. Бирақ ахбарат әркинликини тәшәббус қилғучилар, "франсийә кәчлик гезити" баш муһәрририниң хизмитидин бошутулғанлиқини ахбарат әркинлики принсипиға уйғун әмәс, дәп қариған.

Франсийә ташқий ишлар министирлиқи, франсийә һөкүмитиниң сөз әркинликини қоғдаш принсипида шәк йоқ, дәп көрсәтти. Әмма бу арида норвигийә бихәтәрлик сәвәблири түпәйлидин пәләстиндики иш башқармисини тақиди. Пәләстиндики бәзи радикал гуруһлар данийә, франсийә вә норвигийә пуқралириға һуҗум қилидиғанлиқини агаһландурған.

Данийидә чиқидиған " җилландис - постен гезити" дә елан қилинған бир картун рәсимдә муһәммәд пәйғәмбәрниң сәллиси бомбиға охшитип ясалған. Бирақ бу гезит кейинрәк мусулманлардин әпу сориди. Данийә баш министири рамуссен, " җилландис- постен гезити" ниң әпу сориғанлиқини қарши елиш билән биргә, бу гезитни җазалашни рәт қилди. У, һөкүмәт ахбаратқа чәклимә қоялмайду, дәп тәкитлигән. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт