Diniy kemsitishmu yaki axbarat erkinlikimu ?

Yawropadiki bezi gézitlerde muhemmed peyghemberning yumurluq kartun resimliri bésilghandin kéyin, bu islam ellirining küchlük naraziliqini qozghidi. Bu resimni " fransiye kechlik géziti" de basqan bash muherrir peyshenbe küni wezipisidin élip tashlandi.

Xewerlerge qarighanda , bezi islam elliride "fransiye kechlik géziti" ni tarqitish cheklen'gen. Kartun resim tunji qétim daniyidiki bir gézitte élan qilin'ghandin kéyin, norwigiye, fransiye, gérmaniye, ispaniye we italiye qatarliq döletlerde bezi gézitler bu resimni köchürüp basqan idi.

Se'udi erebistan bilen süriye daniyide turushluq bash elchisini chaqirtiwaldi. Liwiye kopinxagéndiki elchixanisini taqighan. Bezi islam elliride daniye mallirigha bayqut élan qilindi. Musulmanlar yawropa gézitlirining herikitini musulmanlargha qaritilghan hörmetsizlik, dep qarimaqta. Biraq axbarat erkinlikini teshebbus qilghuchilar, "fransiye kechlik géziti" bash muherririning xizmitidin boshutulghanliqini axbarat erkinliki prinsipigha uyghun emes, dep qarighan.

Fransiye tashqiy ishlar ministirliqi, fransiye hökümitining söz erkinlikini qoghdash prinsipida shek yoq, dep körsetti. Emma bu arida norwigiye bixeterlik sewebliri tüpeylidin pelestindiki ish bashqarmisini taqidi. Pelestindiki bezi radikal guruhlar daniye, fransiye we norwigiye puqralirigha hujum qilidighanliqini agahlandurghan.

Daniyide chiqidighan " jillandis - postén géziti" de élan qilin'ghan bir kartun resimde muhemmed peyghemberning sellisi bombigha oxshitip yasalghan. Biraq bu gézit kéyinrek musulmanlardin epu soridi. Daniye bash ministiri ramussén, " jillandis- postén géziti" ning epu sorighanliqini qarshi élish bilen birge, bu gézitni jazalashni ret qildi. U, hökümet axbaratqa cheklime qoyalmaydu, dep tekitligen. (Erkin)