Хәлқара кәчүрүм тәшкилати хитайниң чаған алдида 200 кишини атқанлиқини әйиплиди

Хәлқара кәчүрүм тәшкилати чаршәнбә күни баянат елан қилип, хитай һөкүмитиниң чағанниң алдидики икки һәптә ичидә 200 кишини атқанлиқини әйибләп, бейҗиң һөкүмитини өлүм җазаси иҗра қилишни азайтишқа чақирди.

Хәлқара кәчүрүм тәшкилати йәнә, явропа бирликини хитайға қаратқан қорал чәклимисини бикар қилиш мәсилини музакирә қилғанда чоқум хитайниң кишилик һоқуқ вәзийитини ойлишишқа үндиди.

Мәзкур тәшкилат чиқарған доклатқа қариғанда, хитай һөкүмити чаған алдидики икки һәптидә 200 кишини атқандин сирт, өткән йили 12 - айдин бу йил 1 - айғичә болған қисқиғина икки ай ичидә хитайниң һәр қайси җайлиридин болуп җәмий 650 кишини өлүм җазаси билән етип ташлиған.

Баш шитаби лондондики хәлқара кәчүрүм тәшкилати доклатида, хитай һөкүмитиниң болупму чаған йетип келиши билән өлүм җазасини иҗра қилиш сүритини техиму ашурғанлиқини, һәтта бир қетимлиқта 10 нәччә кишини етиватқанлиқини билдүрди.

Мәзкур тәшкилат доклатида йәнә, "хитай һөкүмити, ‘муқимлиқни сақлаш вә хәлқниң йеңи йилни тинч-аман өткүзүшигә капаләтлик қилиш нами билән адәм етиватиду. Бу толиму хәтәрлик бир уқум" дәп көрсәтти.

Хитай һөкүмити адәм өлтүрүш, басқунчилиқ вә баҗ оғрилаштин тартип сиясий җинайәткичә болған түрлүк җинайәтләргә өлүм җазаси беридиған болуп, хитай бойичә пәқәт уйғурлар билән тибәтләргила сиясий җинайәт билән өлүм җазаси берилиду. (Пәридә)