خەلقئارا كەچۈرۈم تەشكىلاتى خىتاينى ئەمگەك بىلەن ئۆزگەرتىش تۈزۈمىنى بىكار قىلىشقا چاقىردى


2007-10-19
Share

مەركىزى لوندوندىكى خەلقئارا كەچۈرۈم تەشكىلاتى پەيشەنبە كۈنى خىتاي خەلق قۇرۇلتىيىنىڭ مەملىكەتلىك دائىمىي كومىتېتىغا ئوچۇق خەت ئېلان قىلىپ، خىتاينى ئەمگەك بىلەن ئۆزگەرتىشنى ئاساس قىلغان "لاۋگەي" تۈزۈمىنى بىكار قىلىشقا چاقىردى.

ئوچۇق خەتتە، خىتاينىڭ ئەمگەك بىلەن ئۆزگەرتىش سېستىمىسىدا مىڭلىغان - ئون مىڭلىغان كىشىلەر تۇتۇپ تۇرۇلماقتا. بۇ تۈردىكى ئەمگەك بىلەن ئۆزگەرتىش لاگىرلىرىنىڭ كۆپ قىسىمىنىڭ شارائىتى ئىنتايىن جاپالىق بولۇپ، بۇ خىل كەمسىتىش تەدبىرلىرى ئولىمپىك روھىغا پۈتۈنلەي خىلاپتۇر،دەپ كۆرسەتتى.

ئوچۇق خەتتە يەنە، خىتاي دائىرىلىرىنىڭ يېقىندىن بېرى بۇ تۈزۈمنى تېخىمۇ كۈچەيتكەنلىكىدىن بىئارام بولۇۋاتقانلىقىنى ئەسكەرتىپ، بېيجىڭ ساقچى دائىرىلىرى 2008 ‏- يىلى ئۆتكۈزۈلىدىغان بېيجىڭ ئولىمپىك يىغىنى يېتىپ كېلىشتىن بۇرۇن، ئەمگەك بىلەن ئۆزگەرتىشتىن ئىبارەت بۇ كەمسىتىش خاراكتېرلىك تەدبىرنى تېخىمۇ كۈچەيتمەكتە ۋە پۇقرالارغا قارىتا ئەمگەك بىلەن ئۆزگەرتىش ھەم مەجبۇرلاش خاراكتېرلىك زەھەر تاشلىتىش ۋاستىلىرىنى قوللانماقتا، دەپ ئەسكەرتتى. ئوچۇق خەتتە، خىتاي خەلق قۇرۇلتىيى دائىمىي كومىتېتىنى 2008 ‏- يىلى بېيجىڭ ئولىمپىك يىغىنى يېتىپ كېلىشتىن بۇرۇن، ئەمگەك بىلەن ئۆزگەرتىش قانۇنىنىڭ ئورنىغا دەسسىتىدىغان ھەر قانداق بىر قانۇن چىقارماقچى بولسا، بۇ قانۇننىڭ خەلقئارا كىشىلىك ھوقۇق ئۆلچىمىگە ئۇيغۇن بولۇشىغا كاپالەتلىك قىلىشقا، جۈملىدىن پۇقرالارنىڭ ئادىل سوتلىنىش ھوقۇقىغا كاپالەتلىك قىلىشقا چاقىردى.

خەلقئارا كىشىلىك ھوقۇق تەشكىلاتلىرى خىتاينىڭ ئەمگەك بىلەن ئۆزگەرتىش تۈزۈمىنى كىشىلىك ھوقۇققا قىلىنغان ئېغىر دەپسەندىچىلىك، دەپ ئەيىبلىمەكتە. (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت