Хитайниң кишилик һоқуқ хатириси америкини үмидсизләндүрди

Америка ташқи ишлар министирлиқи дүшәнбә күни дуняниң 2004 - йилдики кишилик һоқуқ вәзийити һәққидә доклат елан қилип, хитай кишилик һоқуқ хатирисиниң 2004 - йилдики тәрәққияти вә бу саһәдики һәмкарлиқи кишини үнмидсизләндүриду, дәп көрсәтти.

Америка ташқи ишлар министирлиқи, хитай һөкүмитини 2002 - йилдики хитай - америка кишилик һоқуқ сөһбитидә америкиға бәргән вәдисини орунлимиди, дәп әйиблигән. Хитай һөкүмитиниң терорчилиққа қарши турушни баһанә қилип, тинч вә мөтидил уссуллар арқилиқ ухшимиған көз қаришини ипадилигән уйғурларниң бастурулғанлиқини шундақла ташқи дуняниң хитай кишилик һоқуқ хатирисини назарәт қилишиға йол қоймиғанлиқини тилға алған.

Ташқи ишлар министйирлиқиниң доклатида көрситилишичә, хитай һөкүмити өткән йили сияси өктичиләрни, өктичиләрниң адвукатлирини, әйдиз кесәллиригә ярдәм қилғучиларни, диний затларни, мухбирларни, охшимиған көз қараштики зиялиларни шундақла ишчилар һәрикитиниң рәһбәрлирини давамлиқ тутқун қилған.

Ташқи ишлар министирлиқи хитай даирилириниң мәһбусларға тән җазаси бериватқанлиқини тәнқид қилип, гәрчә кишилик һоқуқни қоғдаш вә һөрмәт қилиш хитай асаси қануниға киргүзүлгән болсиму бирақ, бейҗиң даирилириниң мәзкур қанун маддисиға қайси дәриҗидә әмәл қилидиғанлиқи йәнила айдиң әмәс, дәп тәкитлигән. Амма бейҗиң һөкүмити, хитай кишилик һоқуқ хатириси тоғрисидики тәнқидләрни рәт қилип кәлмәктә. (Әркин)