Ли җавшиң, шветсарийә ташқи ишлар министири билән кишилик һоқуқ мәсилилири бойичә сөзләшти

Хитай ташқи ишлар министири ли җавшиң пәйшәнбә күни шветсарийиниң берин шәһиридә шветсарийә ташқи ишлар министири калмий рей ханим билән учрашқанда, җоңго кишилик һоқуқ өлчимидики пәрқләрни түгүтүш үчүн тиришмақта, дәп көрсәтти. У, калмий рей билән учрашқандин кейин мухбирларға хитай кишилик һоқуқ вәзийитини има қилип, " бу йәрдә қилишқа тегишлик нурғун ишлар бар," дәп тәкитлигән.

Хитай даирилири б д т ниң кишилик һоқуқ әһдинамилириға қол қойған болсиму, әмма уни иҗра қилиш мәсилисидә сөрәлмилик қилиш билән әйипләнмәктә. Ли җавшиң хитай кишилик һоқуқ хатирисини ақлап, америкини йошурун тәнқид қилди. У, " җоңго қол қойған кишилик һоқуқ әһдинамилири америкидин көп," дәйду.

Ташқи ишлар министири калмий рейниң тәкитлишичә, шветсарийә 1991 - йилдин бери хитай билән кишилик һоқуқ мәсилилири бойичә сөһбәт елип бармақта. У, бу сөһбәт өз ара чүшүнишкә пайдилиқ,' дәйду. Франсийә ахбарат агентлиқиниң хәвәрқилишичә, ли җавшиң билән калмий рей сөһбәт җәрянида б д т кишилик һоқуқ комитетиниң ислаһати вә кишилик һоқуқ кеңиши қуруш қатарлиқ мәсилиләрни музакирә қилған.

Б д т ниң һазирқи мәвҗут кишилик һоқуқ комитети кишилик һоқуқни дәпсәндә қиливатқан дөләтләр тәрипидин игилливелинди, дәп тәнқидләнмәктә. Франсийә ахбарат агентлиқиниң тәкитлишичә, хитайға охшаш бәзи дөләтләр кишилик һоқуқ комитетидики орнидин пайдилинип, мәзкур комитетниң бәзи қарарларни чиқиришиға тосқунлуқ қилған. Әмма бейҗиң даирилири бу хил әйипләшни рәт қилған. (Әркин)