Kishilik hoquq közitish teshkilati xitayni axbarat erkinlikini we kishilik hoquqni basturush bilen eyiblidi

Xelqara kishilik hoquq közitish teshkilati seyshenbe küni doklat élan qilip xitayni" olimpik ötküzüshte bergen wedisige xilapliq qilip axbarat sahesini dawamliq basturmaqta"dep eyiblidi hemde xelqara olimpik komitétini béyjinggha qarita axbarat sahesige erkinlik bérish heqqide bésim ishlitishke chaqirdi.

Kishilik hoquq közitish teshkilatining mezkur 40 betlik doklatida körsitishiche , béyjing hökümiti olimpikqa bir yil qalghan bügünki kündimu , özining olimpik jeryanida xelq'ara axbaratqa erkinlik bérish wedisige xilap halda chet'el muxbirlirigha tehdit qilish, qorqutush hetta qolgha élish usullirini qollinip kelmekte , xitayning bu qilmishliri olimpik komitétigha qilghan ehdisi buyiche yeni 1 - ayning1 - küni élan qilin'ghan axbarat erkinlikige kapaletlik qilish qararlirigha xilap .

Amérika awazi radi'osining tekitlishiche ,kishilik hoquq közitish teshkilati teripidin élan qilin'ghan mezkur doklat jem'iy 36 neper xitay hemde chet'el muxbirliridin 6 - aydin bashlap igiligen toluq melumatlargha asasen chiqirilghan .

Kishilik hoquq közitish teshkilatining xongkongda turushluq xadimi nigolas amérika awazi radi'osi muxbirigha " xitay hökümiti adettiki metbu'atlar , radi'o ‏- téléwiziye hemde intérnétni öz ichige alghan her qandaq axbarat wasitisigha tosalghuluq qilidu " dégen . Uning bildürüshiche , xitay muxbiri bolsun we yaki chet'el muxbirliri bolsun oxshashla musteqil axbarat élan qilishini chekleydu shundaqla xitay hökümiti éytqan atalmish sezgür mesililer üstidin ziyaret qilish cheklinidu .

Nöwette xitayning kishilik hoquq weziyiti dunya köngül böluwatqan mesile emma , kishilik hoquqqa da'ir mesililerni ashkarilash xitayda téximu qattiq basturulidu . Mana bu mesilining tügüni . Eger bu mesilini mulahize qilish cheklense uni hel qilishtin söz échish mumkin emes. (Gülchéhre)