Дуня кишилик һоқуқ күни б д т кишилик һоқуқ алий кеңишиниң баш комиссари баянат елан қилди

Дуня кишилик һоқуқ хитабнамиси 1948- йили елан қилинған болуп, келәр йили мәзкур хитабнамә елан қилинғиниға 60 йили тошиду.

Б д т кишилик һоқуқ алий кеңишиниң баш комиссари лойисе арбур баянатида: "биз бүгүн пәқәт кишилик һоқуқ күнинила тәбрикләпла қалмай, бәлки дуня кишилик һоқуқ хитабнамисиниң 60 йиллиқи үчүн йәнә бир йилға созулған кишилик һоқуқ күришини башливәттуқ" дәп оттуриға қойди.

У йәнә бүгүнки тәбрикләштә, 1948 - йилидин буян дунядики һәр бир адәмниң түп әркинликини капаләткә игә қилиш йолида қолға кәлтүргән нәтиҗиләрниму тәбрикләйдиғанлиқини көрсәтти.

Арбур баянатида, дуня кишилик һоқуқ хитабнамисиниң мәркизи нишани һәққидә тохтилип: "кишилик һоқуқ хитабнамиси вә униң җәвһири қиммити болса, инсаний қәдир- қиммәткә варислиқ қилиш, һәқ-адаләт, кәмситмәслик, баравәрлик, адиллиқтин ибарәт болуп, бу мизанниң дуняниң һәр бир бурҗикидики һәр бир инсан үчүн һәр заман, һәр маканда ортақ" икәнликини тәкитлиди.

Бу баянатта, дуняниң һәрқайси җайлирида шәхсләрниң, тәшкилатларниң вә һөкүмәтләрниң кишилик һоқуқ хитапнамисида оттуриға қоюлған вәдиләрни реаллиққа айландуруш үчүн күрәш қилғанлиқи, һәтта нурғун кишиләрниң мушу ғайә үчүн қурбан болғанлиқи оттуриға қоюлди.

Баянатта йәнә, дуняниң нурғун җайлирида зораванлиқ, ирқий айримичилиқ, түрмиләрдә қийнаш һәмдә башқа шәкилдики адаләтсизлик қилмишлириниң йәнила мәвҗутлуқи, униңдин башқа бай-кәмбәғәллик арисида барғанчә кеңийиватқан пәрқ, зомигәрлик вә зомигәрлик қурбанлириниң мәвҗут болуп турушиниң кишилик һоқуқ хитапнамисида пүтүлгән һоқуқларниң техиму җараңлиқ рәвиштә күчәйтилиши лазимлиқини көрситидиғанлиқи әскәртилди.

Баянатниң ахирқи қисмида, инсанийәт җәмийитиниң барлиқ әзалирини кишилик һоқуқтин бәһримән қилишниң кишилик һоқуқ хитапнамисида оттуриға қоюлған вәдиләрниң " йүрикидики" вәдә икәнлики көрситилип, бу йил давамида йәнә, дунядики барлиқ инсанларниң өзини қоғдашта пәқәт қанунғила тайинидиған муһит яритиш үчүн вә кишилик һоқуқ хитабнамисиниң вәдилирини толуқ әмәлгә ашуруш үчүн йәнә көпләп тиришчанлиқ көрситишигә тоғра келидиғанлиқи тәкитләнди. (Җүмә)