Shimaliy koriye özining yadro qoralgha ige ikenlikini élan qildi

Shimaliy koriye hökümiti peyshenbe küni bayanat élan qilip, özining yadro qorallargha ige ikenlikini tünji qétim élan qildi hemde shimaliy koriye yadro mesilisini hel qilish yolidiki alte terep söhbitige yéqin kelgüside qatnishishni ret qildi.

Shimaliy koriyining tashqi ishlar ministirliqi koriye merkizi axbarat agéntliqida élan qilghan bayanatida: "biz bush hökümitining shimaliy koriyini yalghuz qaldurush we boghushtek düshmen siyasitige taqabil turup, özimizni qoghdash üchün, yadro qorallarni ishlepchiqarduq" dep bildürgen.

Shimaliy koriye da'iriliri yene, amérika hökümitining shimaliy koriyige qaratqan düshmenlik siyasiti sewebidin, alte terep söhbitige qatnishishni ret qilidighanliqini körsetti.

Amérika birleshme axbarat agéntliqining xewirige qarighanda, amérika tashqi ishlar ministiri kondiliza rayis buninggha derhal inkas qayturup, bu qilmish, shimaliy koriyini xelq'arada téximu yalghuz qaldurighanliqini körsetti.

U sözide : "amérika hökümitining shimaliy koriyige hujum qilish niyiti yoq. Biz ulargha alliqachan yadro qoral yasash pilanidin waz kechse, köp tereplime bixeterlikige kapalet qilidighanliqimizni yetküzgen" dédi.

Shimaliy koriye yadru mesilisini hel qilish yolidiki alte terep söhbitige qatnishiwatqan rusiye, yaponiye we jenubiy koriyimu, shimaliy koriyining bu bayanatidin qattiq epsuslan'ghanliqini ipadilidi. Xitay hökümiti bolsa, alte terep söhbitini dawamlashturushni ümid qilidighanliqini körsetti.

Shimaliy koriye yadro krizisi 2002 - yili öktebirde partlighan. Amérika hökümet da'iriliri shimaliy koriyining xelq'ara kélishimlerge xilap halda uran chékilesh programmisini mexpiy élip bériwatqanliqini bildürüp, shimaliy koriyige bériwatqan néfit yardimini toxtitiwetkendin kiyin, shimaliy koriye xelq'ara yadro qorallarni kéngeytmeslik kélishimidin chékinip chiqqan we yadro programmisini bashlighan.

Xewerge qarighanda, amérika da'iriliri alte terep söhbitige qatnishiwatqan her qaysi döletler söhbet ötküzüp, kéyinki qedemdiki pilanni muzakire qilidiken. (Arzu)