Җәнубий корийә, шималий корийиниң ядро қоралға игә икәнликидин гуманлинидикән


2005.02.14
Share on WhatsApp
Share on WhatsApp

Җәнубий корийә дүшәнбә күни шималий корийиниң ядро қоралға игә икәнликидин гуманлинидиғанлиқини билдүрди.

Ройтирс агентлиқиниң хәвиригә қариғанда, җәнубий корийиниң бирликкә кәлтүрүш министири чуң доңюң дүшәнбә күни дөләт парламентида сөз қилип, "шималий корийини һазирдин ядро қоралға игә дөләт дәп қараш бәкла балдур. Чүнки, шималий корийә техи атом бомбиси синиқи елип бармиди", деди.

Шималий корийә өткән пәйшәнбә күни баянат елан қилип, түнҗи қетим өзиниң ядро қоралға игә икәнликини билдүргән һәмдә шималий корийә ядро мәсилисини һәл қилиш йолида җәнубий корийә, америка, японийә, русийә вә хитай билән өткүзүватқан алтә тәрәп сөһбитидин чекинип чиққанлиқини көрсәткән иди.

Бирақ, чуң доңюң сөзидә, һазирғичә шималий корийиниң ядро қорал ясиғанлиқи һәққидә йәкүн характерлик бирәр испатниң йоқлиқини тәкитлиди. У йәнә пийоңяңниң бу баянатни вашингтонға бесим ишлитиш үчүн елан қилған болуши мумкинликини көрсәтти. Әмма, америка әмәлдарлири вә мутәхәссислири, шималий корийә аз дегәндә бир икки данидин сәккиз даниғичә ядро қоралға игә болуши мумкин дәп қарайдикән.

Шуниң билән бир вақитта, гәрчә шималий корийә алтә тәрәп сөһбитидин чекинип чиққанлиқини билдүргән болсиму, бирақ хитай һөкүмити дүшәнбә күни русийигә, бейҗиңниң йеңи бир қарар алтә тәрәп сөһбитини илгири сүридиғанлиқини билдүргән. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.