Талибанлар билән җәнубий корийә һөкүмәт хадимлири оттурисидики сөһбәт давамлашмақта

Талибанлар тәрипидин 19‏- июл күни афғанистанда гөрөгә елинған 21 нәпәр җәнубий корийә пуқрасиниң қоюп берилиши үчүн, афғанистанниң ғәзни шәһиридә җәнубий корийә һөкүмәт хадимлири билән талибан вәкиллири оттурисида елип бериливатқан сөһбәтләр давамлишиватиду.

Талибан рәһбәрлири 21 нәпәр җәнубий корийә пуқрасини қоюп бериш үчүн, афғанистан һөкүмитиниң түрмидики 21 нәпәр талибан мәһбусини қоюп беришини тәләп қилмақта. Гәрчә афғанистан һөкүмити, талибан вәкиллири билән җәнубий корийә һөкүмәт хадимлири оттурисида сөһбәт елип берилишиға рухсәт қилған болсиму, әмма түрмидики талибан мәһбуслирини қоюп беришни рәт қилмақта. Афған һөкүмәт хадимлириниң ейтишичә, талибан вәкиллири билән сөһбәт өткүзүш арқилиқ гөрүгә елинғанларниң мәсилсини бир тәрәп қилиш мумкин әмәс икән.

Әмма сөһбәткә қатнишиватқан икки талибан вәкилиниң бири болған мулла қари бәшир шәнбә күни мухбирларға бәргән баянатида, җәнубий корийә һөкүмәт хадимлири билән елип бериливатқан сөһбәтниң наһайити яхши китиватқанлиқини тәкитләп,"гөрөгә елинғанлар бүгүн яки әртә қоюп берилиши мумкин" дегән.

Бу арида 2001‏- йили америкиниң афғанистанға қаратқан һәрбий һәрикити билән һакимийити гумран болған талибанлар вәкиллириниң афғанистанниң ғәзни шәһиридә җәнубий корийә һөкүмәт хадимлири билән гөрөгә елинған җәнубий корийә пуқралири мәсилсидә сөһбәткә олтурғанлиқи тоғрисидики хәвәр вә көрүнүшләрниң афғанистан ахбарат вастилирида орун елиши, нурғун кишиләрни һәйран қалдурған. Бу хәвәр вә көрүнүшләрниң афғанистан хәлқи арисида яритидиған сәлбий тәсиридин әндишиләнгән һөкүмәт, йәкшәнбә күни мухбирларниң сөһбәт елип бериливатқан районға киришини вә талибан вәкиллирини зиярәт қилишини чәклиди. (Өмәр қанат)