Talibanlar bilen jenubiy koriye hökümet xadimliri otturisidiki söhbet dawamlashmaqta

Talibanlar teripidin 19‏- iyul küni afghanistanda göröge élin'ghan 21 neper jenubiy koriye puqrasining qoyup bérilishi üchün, afghanistanning ghezni shehiride jenubiy koriye hökümet xadimliri bilen taliban wekilliri otturisida élip bériliwatqan söhbetler dawamlishiwatidu.

Taliban rehberliri 21 neper jenubiy koriye puqrasini qoyup bérish üchün, afghanistan hökümitining türmidiki 21 neper taliban mehbusini qoyup bérishini telep qilmaqta. Gerche afghanistan hökümiti, taliban wekilliri bilen jenubiy koriye hökümet xadimliri otturisida söhbet élip bérilishigha ruxset qilghan bolsimu, emma türmidiki taliban mehbuslirini qoyup bérishni ret qilmaqta. Afghan hökümet xadimlirining éytishiche, taliban wekilliri bilen söhbet ötküzüsh arqiliq görüge élin'ghanlarning mesilsini bir terep qilish mumkin emes iken.

Emma söhbetke qatnishiwatqan ikki taliban wekilining biri bolghan mulla qari beshir shenbe küni muxbirlargha bergen bayanatida, jenubiy koriye hökümet xadimliri bilen élip bériliwatqan söhbetning nahayiti yaxshi kitiwatqanliqini tekitlep,"göröge élin'ghanlar bügün yaki erte qoyup bérilishi mumkin" dégen.

Bu arida 2001‏- yili amérikining afghanistan'gha qaratqan herbiy herikiti bilen hakimiyiti gumran bolghan talibanlar wekillirining afghanistanning ghezni shehiride jenubiy koriye hökümet xadimliri bilen göröge élin'ghan jenubiy koriye puqraliri mesilside söhbetke olturghanliqi toghrisidiki xewer we körünüshlerning afghanistan axbarat wastilirida orun élishi, nurghun kishilerni heyran qaldurghan. Bu xewer we körünüshlerning afghanistan xelqi arisida yaritidighan selbiy tesiridin endishilen'gen hökümet, yekshenbe küni muxbirlarning söhbet élip bériliwatqan rayon'gha kirishini we taliban wekillirini ziyaret qilishini cheklidi. (Ömer qanat)