Корийиниң бейҗиңда турушлуқ бир нәпәр дипломати тамақтин зәһәрлинип өлди


2007-08-02
Share

Корийә күндилик гезитиниң 2 - авғуст хәвиридә ейтилишичә , корийиниң хитайда турушлуқ бир әлчиси , таладин тез тамақ сетивелип йегәндин кейин наһайити еғир ичи сүрүп ахири дохтурханида қутқузуш үнүм бәрмәй җенидин айрилған.

Бу тамақтин зәһәрлинип өлүш һадисиси хитайниң сахта мал зәһәрлик йемәклик сәтчилики тоғрисида хәлқара ахбарат саһәсидә көтүрүлгән ғулғулиниң қайта күчийишигә сәвәб болди.

Корийә ахбарат саһәсиниң өлгүчи һәққидә бәргән хәвәрлиридә көрситишичә, 52 яшлиқ хуваң җуң ел корийиниң бейҗиңдики баш әлчиханисидики бир дипломат болуп ,у өткән шәнбә йәни 28 ‏- июл күни кәчтә хизмәттин йенип консулхана хизмәт бинаси әтрапидики бир йемәклик докинидин сандивич сетивелип йегәндин кейин дәрһалла ичи сүрүп сақсиз болуп қалған . Әтиси у әлчихана кочисидики бир шәхси амбулаторийигә кирип асма окул урғузған . Әмма асма окул урғузуп 20 минут болмайла нәписи қисилип өлгән.

Корийә даирилири бейҗиңда турушлуқ әлчисиниң туюқсиз өлүшигә базардин сетивалған сандивич әмәс , шәхси дохтурханида униңға ишләткән асма окулниңму сәвәбчи болғанлиқи гумандин йирақ әмәсликини әскәрткән.

Хитай даирилири бу дипломатниң өлүм сәвәбини ениқлап корийә даирилиригә җаваб беришни вәдә қилип җиддий тәкшүрүватқан икән.

Йеқинда , бейҗиң теливезисиниң бир мухбири хәлқара ахбарат саһәсигә хитайда сахтипәзләрниң кардон қәғәз мантисини сатқанлиқини паш қилғандин кейин , гәрчә хитай һөкүмити мәзкур хәвәрни сахта хәвәр дәп етирап қилмиған болсиму , мушуниңға охшаш тамақтин зәһәрлинип өлүш вәқәлириниң хитайда давамлиқ көрүлүши кишиләрдә хитайниң йемәк ичмәк бихәтәрликигә нисбәтән гуманларни пәйда қилмақта. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт