Косовада б д т тинчлиқ сақлиғучи қисимлири билән серблар тоқунушти


2008-03-17
Share

17 - Март дүшәнбә күни б д т тинчлиқ сақлаш қисимлири шималий косовада серблар игиливалған сотханиға бастуруп кирип сотханини қайтурувалған болсиму, әмма бу җәрянда сақчилар билән серблар арисида тоқунуш йүз бәрди.

Өткән җүмә күнидин башлап серб намайишчилар алдинқи айда елан қилинған косова мустәқиллиқиға қаршилиқ билдүрүп, косованиң митровика шәһиригә җайлашқан б д т башқурушидики бир сотханини игиливалғандин кейин, б д т вә нато тинчлиқ сақлиғучи қисимлири мәзкур сотханини қайтурувелиш үчүн серблар билән тоқунушқан һәмдә тоқунушта аз дегәндиму 22 нәпәр тинчлиқ сақлиғучи қисим әскири вә 8 нәпәр нато әскири яриланған, лекин өлүм - йетим һадисиси көрүлмигән.

Хәвәрләргә қариғанда, намайишчи серблар сотхана алдиға йиғилип б д т вә нато қисимлириға қаритип оқ чиқарған һәмдә гранат вә таш - кесәк атқан болуп, тинчлиқ сақлиғучи қисим яш аққузуш бомбиси етип инкас қайтурған.

Бирләшмә агентлиқида нәқил қилинишичә, бүгүн б д т вә нато косованиң пайтәхти пристинада бирләшмә баянат елан қилип шималий косовада йүз бәргән " намайишчилар сақчиларға от чиқарған қанлиқ зораванлиқи " ни әйибләйдиғанлиқини билдүрди.

Дүшәнбә күни кәчқурунға йеқин б д т қисимлири митровика шәһириниң серблар контроллуқидики қисмидин хадимлирини яндуруп чиққан болсиму, нато қисимлири йәнила бу районда тәртип сақлаш үчүн қалдурулди.

Косова 17 - феврал мустәқиллиқ җакарлиған болуп, шуниңдин етибарән косовадики серблар һәр хил шәкилдә косова мустәқиллиқиға наразилиқ билдүрүп кәлмәктә. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт