Kosowa bash ministiri : mushu bir qanche kün ichide musteqilliq élan qilimiz

Kosowa bash ministiri hashim taji, kosowaning musteqilliqini élan qilish mesilisi "mushu bir qanche künlük ish" bolup qalghanliqini jakarlidi. Hashim taji yawropa ittipaqining tashqi ishlar komisari jawi'ér solana bilen körüshkendin kéyin muxbirlargha élan qilghan bayanatida " biz yene bezi tertiplerge hörmet qilishimiz we bezi pikirlerni élishimiz kérek " deydu.

Hashim tajining eskertishiche, kosowa yawropa ittipaqi we amérika bilen maslishish asasida musteqilliqini jakarlaydiken. Nöwette kosowa nam jehette yenila sérbiyining bir qisimi bolsimu, likin 1999 ‏- yildin béri b d t ning hamiyliqidiki rayon bolup kéliwatidu. Sérbiye da'iriliri bolsa kosowa musteqilliqigha qarshi turmaqta. Kosowa musteqilliqi bu nöwetlik sérbiye prézidént saylimining asasi küntertipini igiligen bolup,- 2 basquchluq bilet tashlash kéler ayda élip bérilidu.

Xewerlerge qarighanda , yawropa ittipaqi musteqilliq jakarlashni sérbiye prézidént saylimidin kéyin élan qilishni ümid qilidiken. Yawropa komitétining bayanatchisi kosowaning musteqilliq küni toghrisida pikir bayan qilishni ret qilip, bu sezgür mesilini tereplerning eng yaxshisi diplomatik yollar bilen bir terep qilishini tewsiye qildi.

Yawropa ittipaqidiki döletler bolsa kosowa rehberlirini yerlik qisimlar kosowadiki b d t qoshunlirining xizmitini ötküzüwalghiche musteqilliq jakarlimasliqqa ündimekte. Yene bir tereptin xitay bilen rusiye kosowaning orni mesiliside choqum sérbiyining maqulliqini élish kérek, dégen qarashta ching turuwatidu. Közetküchilerning eskertishiche, rusiye bilen xitay kosowa musteqilliqi chéchiniye we Uyghurlarning musteqilliq telipini qanunlashturup qoyushidin ensireydiken.