Сербийә һөкүмити косованиң мустәқиллиқини қоллиған дөләтләргә етираз билдүрди

Хәлқара ахбаратларниң 19 - феврал тарқатқан учурлиридин мәлум болушичә, сербийә һөкүмити сәйшәнбә күни косованиң мустәқиллиқини етирап қилған дөләтләргә рәсмий наразилиқини билдүрүш, бу дөләтләрдин дипломатийә әлчилирини қайтуруп келишни қарар қилған.

Сербийә һөкүмити, 17 - феврал күни америка косованиң мустәқиллиқини етирап қилғандин кейинла, америкидики баш әлчисини қайтуруп кәлгәндин башқа америкиниң һәрикитини тәнқид қилған һәмдә косованиң мустәқиллиқини қанунсиз дәп елан илған иди.

Әмма косованиң мустәқиллиқ елан қилиши, америкидин башқа йәнә, әнгилийә, германийә, франсийә, италийә вә түркийә қатарлиқ дөләтләрниң қизғин қоллиши һәм етирап қилишиға еришти. Полша баш министири косованиң мустәқиллиқини тонуш тоғрисида һөкүмитигә тәклип сунушни ейтти. Дунядики нурғун дөләтләрниң косованиң мустәқиллиқини тонуш тоғрисида җиддий қарар қилиниватқанлиқи хәвәр қилинмақта.

Сербийә президенти дүшәнбә күни,орни нюйорктики бирләшкән дөләтләр тәшкилати бихәтәрлик кеңишидә мәхсус баянат берип, бирләшкән дөләтләр тәшкилатидин җиддий йиғин чақирип "косованиң мустәқиллиқини хәлқара қанунға хилап" дәп елан қилишни тәләп қилди.Хитай билән русийә болса сербийиниң пикрини қизғин қоллиған. Русийә тәрәп һәтта"косованиң мустәқиллиқ елан қилиши хәлқара муқимлиққа тәһдит"дәп көрсәткән.

Ройетирс агентлиқиниң сәйшәнбидики хәвиридә көрситишичә, косова мустәқиллиқини етирап қилиш ‏- қилмаслиқ мәсилиси һәр қайси дөләтләрни икки қутупқа айриған болуп,русийә вә хитайға охшаш өз дөләт ичидә аз санлиқ милләтләрниң бөлгүнчилик һәрикәтлиридин әндишә қиливатқан шуниңдәк мустәқиллиқ һәрикәтлири давам қиливатқан йәнә бир қисим дөләтләр косова мустәқиллиқини етирап қилмиғандин сирт, алаһидә қарши позитсийә тутуватқан болуп, буниң ичидә хитай һөкүмити косова мустәқиллиқиниң тәйвән, шәрқий түркистан һәмдә тибәт мустәқилчилиригә риғбәтләндүрүш сигнали берип қоюшидин әндишә қилидикән. (Гүлчеһрә)