Sérbiye hökümiti kosowaning musteqilliqini qollighan döletlerge étiraz bildürdi


2008.02.19
Share on WhatsApp
Share on WhatsApp

Xelq'ara axbaratlarning 19 - féwral tarqatqan uchurliridin melum bolushiche, sérbiye hökümiti seyshenbe küni kosowaning musteqilliqini étirap qilghan döletlerge resmiy naraziliqini bildürüsh, bu döletlerdin diplomatiye elchilirini qayturup kélishni qarar qilghan.

Sérbiye hökümiti, 17 - féwral küni amérika kosowaning musteqilliqini étirap qilghandin kéyinla, amérikidiki bash elchisini qayturup kelgendin bashqa amérikining herikitini tenqid qilghan hemde kosowaning musteqilliqini qanunsiz dep élan ilghan idi.

Emma kosowaning musteqilliq élan qilishi, amérikidin bashqa yene, en'giliye, gérmaniye, fransiye, italiye we türkiye qatarliq döletlerning qizghin qollishi hem étirap qilishigha érishti. Polsha bash ministiri kosowaning musteqilliqini tonush toghrisida hökümitige teklip sunushni éytti. Dunyadiki nurghun döletlerning kosowaning musteqilliqini tonush toghrisida jiddiy qarar qiliniwatqanliqi xewer qilinmaqta.

Sérbiye prézidénti düshenbe küni,orni nyuyorktiki birleshken döletler teshkilati bixeterlik kéngishide mexsus bayanat bérip, birleshken döletler teshkilatidin jiddiy yighin chaqirip "kosowaning musteqilliqini xelq'ara qanun'gha xilap" dep élan qilishni telep qildi.Xitay bilen rusiye bolsa sérbiyining pikrini qizghin qollighan. Rusiye terep hetta"kosowaning musteqilliq élan qilishi xelq'ara muqimliqqa tehdit"dep körsetken.

Royétirs agéntliqining seyshenbidiki xewiride körsitishiche, kosowa musteqilliqini étirap qilish ‏- qilmasliq mesilisi her qaysi döletlerni ikki qutupqa ayrighan bolup,rusiye we xitaygha oxshash öz dölet ichide az sanliq milletlerning bölgünchilik heriketliridin endishe qiliwatqan shuningdek musteqilliq heriketliri dawam qiliwatqan yene bir qisim döletler kosowa musteqilliqini étirap qilmighandin sirt, alahide qarshi pozitsiye tutuwatqan bolup, buning ichide xitay hökümiti kosowa musteqilliqining teywen, sherqiy türkistan hemde tibet musteqilchilirige righbetlendürüsh signali bérip qoyushidin endishe qilidiken. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet