Ахтисари косовани мустәқил қилидиған пиланини б д т бихәтәрлик кеңишигә сунмақчи

Б д т ниң косова мәсилиси бойичә алаһидә вәкили марти ахтисари косовани мустәқил бир дөләткә айландурудиған пиланини келәр ай б д т бихәтәрлик кеңишигә сунмақчи.

2‏- Айниң башлирида финландийиниң сабиқ президенти вә б д т ниң косова мәсилиси бойичә алаһидә вәкили ахтисари тәрипидин ашкариланған пиланда, гәрчә косова мустәқил бир дөләт дәп аталмиған болсиму, әмма бу пилан мустәқил бир дөләт үчүн керәклик пүтүн шәртләрни өз ичигә алиду.

Косовадики албанларниң рәһбәрлири ахтисари тәрипидин оттуриға қоюлған пиланни аллиқачан қобул қилған. Лекин косовадики сирб вәкиллири пиланни рәт қилмақта. Сирб вәкилләр ахирқи үмидини б д т бихәтәрлик кеңишиниң әзаси болған русийә билән хитайға бағлиған.

Америка бирләшмә агентлиқиниң хәвәр қилишичә, косовадики сирбларниң вәкили люн коҗән " русийә вә хитайниң разилиқи болмастин б д т дә һечқандақ қарар қобул қилинмайду. Шуниң үчүн ахтисари пиланиниң б д т бихәтәрлик кеңишигә сунулидиғанлиқидин унчила әнсримәймән" дегән.

Косованиң мустәқиллиқини қоллаватқан америка һөкүмити, ахтисарииниң пиланини 1999‏- йилидин бери б д т тәрипидин башқурулуп келиватқан косова үчүн әң мувапиқ пилан дәп қаримақта. (Қанат)