Shenbe küni musteqilliq dawasi qiliwatqan kosowaliqlar saylam ötküzüp, kosowaning sérbiye jumhuriyitidin ayrilip, musteqil bolushini yene tekitlidi.
B b s agéntliqining uchurigha asaslan'ghanda, kosowaning asasiy ahalisi hésablinidighan albanlar birdek halda musteqilliqni telep qilip, bu saylamda musteqilliqni qollighuchi partiyige awaz bergen bolsimu, biraq kosowada yashaydighan sérblar buninggha qarshi chiqqan hemde izchil halda kosowaning musteqil bolushigha qarshi turup kelmekte. Kosowada yashaydighan sérbiyilikler saylamgha qatnashmighan.
Texminen bir yérim milyon nopusluq albanlar kosowa ölkisining 120 orun'gha ige yerlik parlaméntni teshkillesh salahiyitige ige. Bu qétim kosowaning bash ministirliq wezipisini atquriwatqan chéki wezipisidin istipa bergen bolup, kosowaliqlarning partiyiliri arisida saylam riqabet liri küchlük bolghan.
Saylamda kosowa démokratik partiyisi üstünlükni igiligen bolup, mezkur partiyining re'isi,yeni sabiq kosowa azadliq qoshunining qomandanliridin biri hashim eger özining kosowaning bash ministiri bolsa, 12-ayning 10-künidin kéyin kosowaning sérbiyidin ayrilip musteqil bolghanliqini jakarlaydighanliqini bildürgen. Chünki, amérika, rusiye we yawropa ittipaqi bu küni kosowaning kélechiki heqqidiki xulase doklatni b d t bixeterlik kéngishige yollaydu. Bu qétimqi parlamént saylimigha kosowadiki 24 partiye qatnashqan bolup, buning 10 i az sanliq milletlerning partiyisi iken. Kosowa musteqilliqini hazir prézidéntliq wezipisini ötewatqan fatmir seydimu izchil qollighan.
Kosowa 1999-yilidin étibaren b d t teripidin ayrim idare qiliniwatqan bolup, bu yerde sérbiye hökümiti mewjut emes. Amérika, yawropa ittipaqi kosowa musteqilliq layihisige qoshulghan bolsimu, biraq sérbiyini qollaydighan rusiye kosowa musteqilliqigha izchil qarshi turup kelmekte. (Ümidwar)
