Косова албанлири өз алдиға мустәқиллиқ җакарлайдиғанлиқини билдүрди

10- Декабир күни миңлиған киши косова пайтәхти пристинада намайиш қилип косова мустәқиллиқи үчүн берилгән вәдиләрни әмәлгә ашурушни тәләп қилип косова рәһбәрлиригә бесим ишләтти. Бирләшкән дөләтләр тәшкилатиниң косованиң тәқдирини бәлгиләш тоғрисида келишим һасил қилидиған ахирқи чеки 10- декабир тошуп, косованиң тәқдири тоғрисида һечқандақ бир қарар елинмиғандин кийин, косовалиқ албанлар өзлириниң ғәрбтики қоллиғучилири билән сөһбәт өткүзүп сербийидин айрилип өз алдиға мустәқиллиқ җакарлайдиғанлиқини билдүрди.

Әмма косова албанлириниң бу хил мәйданиға қарита русийә косованиң өз бешимчилиқ билән елан қилған мустәқиллиқи дуняниң һәрқайси җайлирида зәнҗирсиман инкас пәйда қилиду дәп агаһландуруш бәрди.

Америка қошма штатлири, русийә вә сербийәләрниң күчлүк қаршилиқиға қаримай косовани бир явропа дөлити дәп тонуйдиғанлиқи тоғрисида вәдә берип косова мустәқиллиқиниң мумкинчиликини ашкарилиған.

Австралийидә чиқидиған нопузлуқ гезит австралиян гезитидә көрситилишичә, косованиң сербийә билән сөһбәт өткүзүш вәкилләр өмикиниң баянатчиси искәндәр һйсәний пристинада мундақ дегән: " бүгүндин башлап косова өзиниң муһим хәлқаралиқ шериклири билән косованиң мустәқиллиқи үчүн алидиған иккинчи қәдими һәққидә сөһбитини башлайду " .

У йәнә: " косова вә косова хәлқи өз кәлгүсини рошән билишкә тәшна . Косова асасий қануни шу хил рошәнликни узунға қалмай җакарлайду" дегән.

Мәлум болушичә, явропа иттипақи министирлири 10 - декабир билгийиниң бруссел шәһиригә йиғилип косованиң мустәқиллиқи һәққидә пикир бирлики һасил қилиш үчүн сөһбәт елип бармақта икән. (Җүмә)