Kosowa albanliri öz aldigha musteqilliq jakarlaydighanliqini bildürdi

10- Dékabir küni minglighan kishi kosowa paytexti pristinada namayish qilip kosowa musteqilliqi üchün bérilgen wedilerni emelge ashurushni telep qilip kosowa rehberlirige bésim ishletti. Birleshken döletler teshkilatining kosowaning teqdirini belgilesh toghrisida kélishim hasil qilidighan axirqi chéki 10- dékabir toshup, kosowaning teqdiri toghrisida héchqandaq bir qarar élinmighandin kiyin, kosowaliq albanlar özlirining gherbtiki qollighuchiliri bilen söhbet ötküzüp sérbiyidin ayrilip öz aldigha musteqilliq jakarlaydighanliqini bildürdi.

Emma kosowa albanlirining bu xil meydanigha qarita rusiye kosowaning öz béshimchiliq bilen élan qilghan musteqilliqi dunyaning herqaysi jaylirida zenjirsiman inkas peyda qilidu dep agahlandurush berdi.

Amérika qoshma shtatliri, rusiye we sérbiyelerning küchlük qarshiliqigha qarimay kosowani bir yawropa döliti dep tonuydighanliqi toghrisida wede bérip kosowa musteqilliqining mumkinchilikini ashkarilighan.

Awstraliyide chiqidighan nopuzluq gézit awstraliyan gézitide körsitilishiche, kosowaning sérbiye bilen söhbet ötküzüsh wekiller ömikining bayanatchisi iskender hyseniy pristinada mundaq dégen: " bügündin bashlap kosowa özining muhim xelq'araliq shérikliri bilen kosowaning musteqilliqi üchün alidighan ikkinchi qedimi heqqide söhbitini bashlaydu " .

U yene: " kosowa we kosowa xelqi öz kelgüsini roshen bilishke teshna . Kosowa asasiy qanuni shu xil roshenlikni uzun'gha qalmay jakarlaydu" dégen.

Melum bolushiche, yawropa ittipaqi ministirliri 10 - dékabir bilgiyining brussél shehirige yighilip kosowaning musteqilliqi heqqide pikir birliki hasil qilish üchün söhbet élip barmaqta iken. (Jüme)