Русийә косова мустәқиллиқ мәсилисидә ғәрб әллирини агаһландурди

Мәлум болушичә, бирләшкән дөләтләр тәшкилати бихәтәрлик кеңиши мушу чаршәнбә күни косованиң кәлгүси мәсилисидә интайин муһим бир йиғин чақирмақчи. Мәзкур йиғин йеқинлишип келишигә әгишип, дүшәнбә күни русийә даирилири косова мәсилисидә ғәрб әллирини агаһландуруп, косоваға мустәқиллиқ бериш " тизгинлигили болмайдиған кризисларни" вә " җиддий сәлбий ақивәтләрни" кәлтүрүп чиқириду дәп агаһландурди.

Франсийә агентлиқида көрситилишичә, русийә ташқи ишлар министирлики баянатида: "әгәр хәлқаралиқ қанун иҗра қилинмиса, косованиң һазирқи әһвали тизгинлигили болмайдиған кризисларни кәлтүрүп чиқириш хәтири астида турмақта" дәп көрсәткән вә косованиң кәлгүси мәсилиси чоқум бирләшкән дөләтләр тәшкилатни бихәтәрлик кеңиши ичидә бекитилиши лазимлиқини тәкитлигән.

Баянатта хәлқара җәмийәт, косова өз алдиға җакарлайдиған мустәқиллиқ кәлтүрүп чиқиридиған барлиқ ақивәтләрни йәнә бир қетим тәпсилий дәңсәп көрүшкә вә пристина билән белград арисида сөһбәтни күчәйтишкә чақирған.

Хәвәрдә ашкарилинишичә, ғәрб әллири әмәлдарлар вә мутәхәссислири, косова рәһбәрлириниң келәр айда мустәқил болуш пикрини җакарлап, келәр йили майда ғәрбтики иттипақдашлиридин явропа иттипақи вә америка тәрәпләрниң маслишиш асасида, сербийидин пүтүнләй айрилип чиқиши мумкин икәнликини илгири сүрмәктә.

Һалбуки, сербийә косованиң тарихтин буян сербийә земини дәп қарап косованиң мустәқил болуш идийисигә күчлүк қарши турмақта.

Шималий атлантик окян әһди тәшкилати қошунлири сербийә һөкүмити косова албанлири үстидин елип барған ирқий тазилашни аяқлаштуруш үчүн 1999- йили сербийини бомбардиман қилип, сербийә армийисини косовадин чекиндүргәндин буян, косовада бирләшкән дөләтләр тәшкилати тинчлиқ сақлаш қошунлири туруп кәлмә. (Җүмә)