Sérbiye parlaménti kosowa mesilisini muzakire qildi

Sérblar bilen albanlar kosowaning kélechek orni toghrisida pikir birlikige kélelmey, kosowa mesilisini kélshtürüshning waqit jedwili 1 - dékabirda toshqandin béri, sérbiye parlaménti charshenbe küni 1 - qétim kosowa mesilisini muzakire qilish meqsitide toplandi. Kosowa alban hakimiyiti bolsa bir qanche hepte ichide kosowa musteqilliqini bir tereplimilik jakarlaydighanliqini élan qilghan idi.

Kosowa musteqilliqigha qarshi turuwatqan sérblar , charshenbe künki yighinda kosowa bir tereplimilik musteqilliq jakarlisa buninggha qandaq inkas qayturush mesilisini muzakire qilmaqchi. Shu küni sérbiye hökümiti bir qanun teklip layihisini parlaméntning testiqlishigha sun'ghan bolup, qanun layihiside sérbiye zémin pütünlikini qoghdashning aldinqi qatardiki wezipe ikenlikini tekitligen. Parlaméntning échilish murasimida sérbiye prézidénti boris tadich, kosowa musteqilliqini qobul qilmaydighanliqini bildürdi shundaqla xelq'ara jem'iyet qobul qilsa sérbiyining kosowadiki gheyri albanlarni qoghdash wezipisini üstige élishqa teyyar ikenlikini eskertti.

Közetküchilerning eskertishiche, eger kosowa musteqilliqini jakarlisa sérbiye xelq'ara sot mehkimilirige kosowa musteqilliqining qanunsiz ikenliki üstide dawa qilishi mumkin. Sérbiye da'iriliri yene kosowa musteqilliq jakarlisa uni étirap qilghan döletler bilen diplomatik munasiwitini üzidighanliqini agahlandurmaqta.

Kosowa musteqilliqi b d t da rusiye, xitay we iranlarning qarshi turushigha uchrawatidu. Közetküchilerning eskertishiche, xitay bilen rusiye kosowa musteqil bolsa buning chéchenler we Uyghurlarning musteqilliq dawasini qanunlashturup qoyushidin ensireydiken. (Erkin)