Явропадики нопузлуқ дөләтләр косова мустәқиллиқини етирап қилишқа башлиди


2008.02.18

Косова алдинқи күни мустәқиллиқини елан қилғандин кейин, дуняниң һәрқайси җайлирида косова мустәқиллиқини қоллайдиған дөләтләр көпийишкә башлиған болуп, ройтерста хәвәр қилинишичә, 18- феврал дүшәнбә күни, явропадики нопузлуқ дөләтләрдин әнглийә, франсийә, германийә қатарлиқ дөләтләр косованиң мустәқиллиқини етирап қилидиғанлиқини җакарлап баянат елан қилди.

Мәзкур баянат, брусселда ечилған явропа иттипақи ташқи ишлар министирлири қатнашқан йиғинда елан қилинған. Мәлум болушичә, һазир косова рәһбәрлири башқа дөләтләрдин косова мустәқиллиқини рәсмий етирап қилишини тәләп қилип 192 парчә мәктуп тәйярлап дуняниң һәрқайси җайлиридики дөләтләргә әвәткән.

Словенийә ташқи ишлар министири димитрий рупел явропа иттипақидики нурғун дөләтләрниң косова мустәқиллиқини етирап қилидиғанлиқини билдүргән болса, германийә ташқи ишлар министири франк- валтер стәйнмәйәр косова мустәқиллиқни етирап қилишниң бир муқәррәрлик икәнликини оттуриға қойған.

Һазир танзанийидә зиярәттә болуватқан америка президенти җорҗ бушму дүшәнбә күни, косова мустәқиллиқини қоллайдиғанлиқини билдүрди вә " бу косовалиқлар мана әмди мустәқил болди" деди.

Косова сербийиниң башқурушидики аз санлиқ албан мусулманлар топлишип олтурақлашқан район болуп, албанлар мәзкур райондики 2 милйон нопусниң 90 пирсәнтини игиләйду.

Косовада 1999- йилидин буян шималий атлантик окян әһди тәшкилатиниң 16 миң кишилик тинчлиқ сақлаш қисимлири туруватқан болуп, косова шундин етибарән бирләшкән дөләтләр тәшкилати вә натониң башқурушида болуп кәлгән болсиму, сербийә косовани өз территорийисидики земин дәп қарап келиватқан иди. (Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.