Америка сүрийини ливанниң ички ишлириға арилашмаслиққа агаһландурди


2005.02.16

Ливанниң сабиқ баш министири рәфиқ харири қәстләп өлтүрүлгәндин кейин, америка ташқи ишлар министири кондолиза райс чаршәнбә күни сүрийә һөкүмитини ливанниң ички ишлириға арилашмаслиққа агаһландурди һәмдә америкиниң сүрийигә қарита йеңидин бир дипломатик җаза йүргүзүш еһтималлиқиниңму барлиқини әскәртти.

Райс сөзидә йәнә, гәрчә америка сүрийини харириниң вапати билән бивастә әйиплимисиму, әмма бу вәқәниң, сүрийә қошуниниң ливанда давамлиқ туруши нәтиҗисидә, бу районниң муқимлиқиға тәсир йетидиғанлиқидин дерәк беридиғанлиқини билдүрди.

У йәнә, америкиниң нөвәттә бу вәқәгә қандақ инкас қайтуруш вә сүрийигә қандақ дипломатик җаза йүргүзүш һәққидә бирләшкән дөләтләр тәшкилати билән музакирилишиватқанлиқини илгири сүрди.

Бу арида, ливан пайтәхти бейрутта рәфиқ харириниң намизи чүшүрүлүп, униңға нәччә йүз миңлиған ливан хәлқи қатнашти. Улар бир тәрәптин харириниң вапатиға қаттиқ қайғурса йәнә бир тәрәптин сүрийә һөкүмитигә ғәзәплинип, "итлириңларни бейруттин елип чиқиңлар" дәп товлашти.

Америка бирләшмә ахбарат агентлиқиниң хәвиригә қариғанда, нөвәттә ливанда сүрийиниң 15 миң кишилик қошуни туриватқан болуп, бу вәқәдин кейин һәтта бирләшкән дөләтләр тәшкилати баш секритари кофи аннанму сүрийини ливандин қошун чекиндүрүшкә чақирған. Нөвәттә сүрийә һөкүмити бу һәқтә хәлқара җамаәтниң бесимиға учримақта. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.