Amérika süriyini liwanning ichki ishlirigha arilashmasliqqa agahlandurdi

Liwanning sabiq bash ministiri refiq xariri qestlep öltürülgendin kéyin, amérika tashqi ishlar ministiri kondoliza rays charshenbe küni süriye hökümitini liwanning ichki ishlirigha arilashmasliqqa agahlandurdi hemde amérikining süriyige qarita yéngidin bir diplomatik jaza yürgüzüsh éhtimalliqiningmu barliqini eskertti.

Rays sözide yene, gerche amérika süriyini xaririning wapati bilen biwaste eyiplimisimu, emma bu weqening, süriye qoshunining liwanda dawamliq turushi netijiside, bu rayonning muqimliqigha tesir yétidighanliqidin dérek béridighanliqini bildürdi.

U yene, amérikining nöwette bu weqege qandaq inkas qayturush we süriyige qandaq diplomatik jaza yürgüzüsh heqqide birleshken döletler teshkilati bilen muzakirilishiwatqanliqini ilgiri sürdi.

Bu arida, liwan paytexti béyrutta refiq xaririning namizi chüshürülüp, uninggha nechche yüz minglighan liwan xelqi qatnashti. Ular bir tereptin xaririning wapatigha qattiq qayghursa yene bir tereptin süriye hökümitige ghezeplinip, "itliringlarni béyruttin élip chiqinglar" dep towlashti.

Amérika birleshme axbarat agéntliqining xewirige qarighanda, nöwette liwanda süriyining 15 ming kishilik qoshuni turiwatqan bolup, bu weqedin kéyin hetta birleshken döletler teshkilati bash sékritari kofi annanmu süriyini liwandin qoshun chékindürüshke chaqirghan. Nöwette süriye hökümiti bu heqte xelq'ara jama'etning bésimigha uchrimaqta. (Peride)