Qirghizistan bilen amérika 2008-yili amérikida birleshme manéwir ötküzidu

Qirghizistan jiddiy ehwalni bir terep qilish ministirliqining ashkarilishiche, qirghizistanning mezkur ministirliqi amérika bilen birleshme manéwir élip bérishqa pütüshken. Bu pütüshüm amérikining qirghizistandiki elchixanisining herbiy hemkarliq ishliri bölümining mes'uli podpolkownik patrik kreb qirghizistan jiddiy ehwalni bir terep qilish ministirliqini ziyaret qilip, ministir muqambet qasimaliyew bilen söhbetleshkende otturigha chiqqan.

Qirghizistanning milliy uchur agéntliqi "qabar"ning xewerliridin qarighanda, qirghizistan alahide ehwalni bir terep qilish ministirliqi bilen amérika terep otturisidiki herbiy -téxnika hemkarliqlirini dawamliq élip bérish mesililiri muzakire qilin'ghan.

Birinchi qétim qirghizistanda bolghan amérika herbiy wekili patrik kreb ikki terep munasiwetlirini kücheytishke tirishidighanliqini bildürgen ,u yene amérikining qirghizistan'gha herbiy téxnika yardimi körsitishke we tejribe almashturushni meqset qilidighan birleshme meshiqlerni élip bérishqa teyyar ikenlikini iz 'har qilghan.

Nöwette, amérikining bishkek ayrodromida hawa armiye bazisi mewjut bolup, bir ay ilgiri amérika dölet mudapi'e ministiri robert geyt bishkekni ziyaret qilip, bu bazini saqlap qélishqa kélishken idi.

Bu yil 16- awghust küni bishkekte shangxey hemkarliq teshkilatining aliy derijilik rehberler yighini bolidu, buninggha hetta iran prézidénti exmedi nijatning közetküchi süpitide qatnishishi mumkinliki , hetta shangxey guruhining xuddi astana xitapnamisigha oxshash qarar chiqirip, amérikining ottura asiyadiki herbiy tesirini chekleshke tirishishi perez qilinmaqta. (Ümidwar)