Америка, тинч окян районида һәрбий маневир өткүзмәкчи


2007.08.05
Share on WhatsApp
Share on WhatsApp

Шаңхәй һәмкарлиқ тәшкилати, мәзкур тәшкилатниң тарихидики әң кәң көләмлик һәрбий маневирға тәйярлиниватқан бир пәйиттә, америка сәйшәнбә күни тинч окян районида өткүзүлидиған һәрбий маневир үчүн, гуам арили әтрапиға әскәр йеғишқа башлиди.

Америка бирләшмә агентлиқиниң хәвәр қилишичә, бир һәптә давамлишидиған бу һәрбий маневирға 22000 әскәр, онлиған уруш парахоти вә йүзлигән уруш айропилани қатнишидикән.

Өткән йили районда өткүзүлгән һәрбий маневир, шималий корийә тәрипидин елип берилған башқурулидиған бомба синиқи сәвәбидин районда вәзийәт кәскәнләшкән бир мәзгилгә тоғра кәлгән болуп, америка һөкүмити маневирға қатнишиватқан икки һәрбий парахотини, шималий корийиниң башқурулидиған бомба синиқини күзүтиш үчүн, корийә арили йеқиниға әвәткән иди.

Америка армийиси, өткән йили елип берилған һәрбий маневирға хитай, һиндистан, японйә вә австралийә қатарлиқ дөләтләрдин һәрбий күзәткүчиләр тәклип қилған болуп, хитай һөкүмити бир деңиз армийә генралиниң риясәтчиликидә 10 кишилик бир һәрбий вәкилләр өмики әвәткән иди. Лекин бу йилқи маниверға һечқандақ чәт дөләттин күзәткүчи тәклип қилинмиған.

Америка һәрбий даирилири, бу һәрбий маневирниң районда йүз бериватқан вәқәләр билән мунасивәтсиз икәнликини һәмдә һечқандақ дөләткә қартилмиғанлиқини тәкитлимәктә. Әмма маневирни тәшкиллигән америкиниң хавайидики 519‏- һава армийә әтритиниң баш штабиниң муавин рәиси, мат лофлин бирләшмә агентлиқиға бәргән баянатида,": бу маневир асия-тинч окян районидики дост вә иттипақдашлиримизға, америкиниң районниң бихәтәрликигә қанчилик көңүл бүлүватқанлиқини көрситип бериду" дегән. (Өмәр қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.