Шаңхәй һәмкарлиқ тәшкилати қурулғандин буянқи үчинчи қетимлиқ бирләшмә һәрбий маневирини өткүзиду


2007-08-07
Share

Шаңхәй һәмкарлиқ тәшкилатиға әза дөләтләрниң " 2007 тинчлиқ бурчи" дәп нам берилгән бирләшмә һәрбий маневири 9 ‏- авғуст русийидә башлинип 17 - авғуст ахирлишиду .

Мәзкур маневирда хитай билән русийә асаслиқ рол алидиған болуп ,нәччә миң нәпәр әскәр һәмдә 500 дин артуқ броневик маневирға қатнаштурулиду.

Бир һәптә давам қилмақчи болған бу һәрбий маневирға таҗикистан һәмдә қирғизистан вә қазақистанму қисимларни әвәткән. Бу шаңхәй һәмкарлиқ тәшкилати қурулғандин буянқи әза дөләтләрниң ‏-3 қетимлиқ һәрбий маневир өткүзүши һесаблиниду.

Әнгилийә б б с радио телевизийисиниң бу һәқтә бәргән хәвиридә русийә қуруқлуқ армийә муавин қомандани виладимер вартинискофниң сөзини нәқил кәлтүрүшичә , бу қетимлиқ һәрбий маневирға русийә аз дегәндә 6000 әскәр қатнаштурған .

Хитай болса 1700 офитсер һәм әскәр вә 46 һәрбий айропилан әвәткән.

Шинхуа агентлиқиниң хәвиригә қариғанда, хитай рәиси ху җинтав шаңхәй һәмкарлиқ тәшкилатиниң мәзкур һәрбий маневир җәрянида йәни14 - авғусттин 18 - авғустқичә русийә , қирғизистан һәмдә қазақистанларда зиярәттә болуп һәрбий маневирни күздин кәчүридикән. Шундақла шаңхәй бирликиниң қирғизистанда ечилидиған 7 - нөвәтлик йиғиниға қатнашқандин кейин мәхсус дөләт ишлири зиярити үчүн қазақистанға баридикән.

Мәзкур һәрбий маневирда һәр қайси дөләт һәрбий қисимлири террорчиларни битчит қилиш мәшиқлирини елип баридиған болуп маневирниң тәйярлиқ басқучи тамамланған . Б б с ниң хәвиридә әскәртилишичә , бәзи мулаһизичиләр " шаңхәй һәмкарлиқ тәшкилати шималий атлантик окян әһди тәшкилатиға қарши бир рәқип һесаблиниду, чүнки шаңхәй бирлики ичидә бир һәрбий иттипақ мәвҗут, у шималий атлантик әһди тәшкилатиниң " террорчилиққа қарши уруш" баһанисидә асияға кеңийишини тосушни мәқсәт қилған " дәп анализ қилмақта. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт