بەش دۆلەت يېقىندا ئۆتكۈزۈلىدىغان ھەربىي مانېۋىرنىڭ خىتايغا قارىتىلغانلىقىنى ئىنكار قىلدى
2007.08.24
ياپونىيە، ئامېرىكا، ئاۋسترالىيە ، ھىندىستان ۋە سىنگاپورلار كېلەر ئاي بېنگال قولتۇقىدا ئۆتكۈزمەكچى بولغان بىرلەشمە ھەربىي مانېۋىرنىڭ خىتايغا قارىتىلغانلىقىنى ئىنكار قىلىپ، مانېۋىرنىڭ تېررورىزم، دېڭىز قاراقچىلىرى ۋە مانېۋىرغا قاتناشقۇچى دۆلەتلەر ئارىسىدىكى ھەمكارلىقنى كۈچەيتىشكە قارىتىلغانلىقىنى بىلدۈردى.
ئامېرىكا تىنچ ئوكيان قىسىملىرىنىڭ قوماندانى ئادمىرال تىموتىي كېتىڭ، بېيجىڭ دائىرىلىرىنىڭ مانېۋىرنى خىتايغا قارىتىلغان، دەپ قارىماسلىقىنى ئۈمىد قىلدى. ئۇ ، "ئامېرىكا ۋە باشقا دۆلەتلەرنىڭ خىتاينى يېتىم قالدۇرۇش مەقسىدى يوق،" دەيدۇ. گەرچە مانېۋىرغا قاتناشقۇچى دۆلەتلەر مانېۋىرنىڭ خىتاينى چەكلەشكە قارىتىلغانلىقىنى ئىنكار قىلغان بولسىمۇ، لېكىن ئانالىزچىلار ئاسىيا - تىنچ ئوكيان رايونىدىكى مۇھىم دۆلەت ھېسابلىنىدىغان خىتاينىڭ مانېۋىرغا قاتناشتۇرۇلمىغانلىقى خىتاي ھەربىي كۈچىنىڭ، بولۇپمۇ دېڭىز ئارمىيە كۈچىنىڭ تېز كېڭىيىۋاتقانلىقىنى چەكلەشكە قارىتىلغان، دەپ مۇھاكىمە قىلىشماقتا.
9 - ئاينىڭ 4 - كۈنى باشلىنىدىغان ھەربىي مانېۋىر 6 كۈن داۋاملىشىدىغان بولۇپ، ئامېرىكا مانېۋىرغا 2 دانە ئاۋىئاماتكا ۋە 11 دانە ئۇرۇش پاراخوتى، ياپونىيە 2 دانە ئۇرۇش پاراخوتى، ئاۋسترالىيە بىر قوغلىغۇچى پاراخوت بىلەن بىر ماي قاچىلاش پاراخوتى قاتناشتۇرماقچى. بېنگال قولتۇقى خىتايلار بۇ رايوندىكى بېرما ۋە بېنگاللار بىلەن ھەمكارلىقنى كۈچەيتىپ، بىر دېڭىز ئارمىيە بازىسىغا ئىگە بولۇشنى ئويلاۋاتقان ئىستىراتېگىيىلىك ئەھمىيىتى زور رايوندۇر.
مانېۋىرغا قاتنىشىدىغان دۆلەتلەر ھەربىي ئەمەلدارلىرى پەيشەنبە كۈنى ھىندىستان پايتەختى يېڭى دېھلىغا يىغىلىپ، مانېۋىرنىڭ كۈنتەرتىپى ئۈستىدە مۇزاكىرە ئېلىپ باردى. شۇ كۈنى ياپونىيە باش مىنىستىرى ھىندىستان زىيارىتىنى ئاخىرلاشتۇرغان بولۇپ، ئۇ يېڭى دېھلىدا ھىندىستان، ياپونىيە، ئاۋسترالىيە ۋە ئامېرىكىلار ھەمكارلىقنى كۈچەيتىشى كېرەك، دەپ قارايدىغانلىقىنى تەكىتلىدى، لېكىن خىتاينىڭ ئىسمىنى تىلغا ئالمىدى. ( ئەركىن)
مۇناسىۋەتلىك ماقالىلار
- خىتاي دۆلەت رەئىسى قازاقىستان زىيارىتىنى باشلىدى
- كانادا ئامېرىكىنىڭ گۈەنتانامودىكى ئۇيغۇرلارغا سىياسى پاناھلىق بېرىش تەلىپىنى رەت قىلغان
- خوڭكوڭ سودىگەرلىرى ئامېرىكا بىلەن خىتاي ئوتتۇرىسىدىكى سودا جېڭىنىڭ "قۇربانى بولۇش"تىن ئەنسىرەيدۇ
- ئامېرىكا دۇنيا سودا تەشكىلاتى خىتايدىن نەشىر ھوقۇقىنى قوغداشتا جىددى تەدبىر ئېلىشنى تەلەپ قىلدى
- شاڭخەي ھەمكارلىق تەشكىلاتنىڭ ھەربىي مانېۋىرى ھەققىدىكى ئىنكاسلار
- ئامېرىكا ب د ت دىن، تەيۋەن خىتاينىڭ بىر قىسىمى دېگەن باياناتىنى تۈزۈتىشىنى تەلەپ قىلماقتا
- شاڭخەي ھەمكارلىق تەشكىلاتى ھەربىي مانېۋىرىنىڭ ئىككىنچى بۆلۈمى باشلاندى
- شاڭخەي ھەمكارلىق تەشكىلاتىنىڭ تېررورلۇققا قارشى ھەربىي مانېۋىرى رەسمىي باشلاندى
- شاڭخەي ھەمكارلىق تەشكىلاتى قۇرۇلغاندىن بۇيانقى ئۈچىنچى قېتىملىق بىرلەشمە ھەربىي مانېۋىرىنى ئۆتكۈزىدۇ