Хитай канада уйғурлирини назарәт қилмақта


2007-05-08
Share

Канадада нәшр қилинидиған макләанс җурнилида 4- май хитай җасуслуқ органлириниң канадада яшап паалийәт елип бериватқан уйғур җамаәтчиликигә һәрхил усулларда тәһдит селип келиватқанлиқиға аит бир парчә мақалә елан қилинди.

Мәзкур мақалидә қәйт қилинишчә, хитай мәхпий сақчилири түн ниспидә телефун қилип канада уйғур бирләшмисиниң рәиси мәмәт тохтиға тәһдит салған.

Мәлум болушичә, мәмәт тохтиға телефун қилған хадимлар, телефонни елипла уни тиллап кәткән вә өзлириниң хитай муһаҗирлар комитетидин кәлгәнликини билдүрүп, мәмәт тохтиға уйғурлар канада җамаәтчиликиниң диққитини қолға кәлтүрүш үчүн елип бериватқан сиясий паалийәтлирини тохтитиш, техиму муһими германийидә ечилидиған дуня уйғур қурултийиниң муһакимә йиғиниға қатнашмаслиқ һәққидә бесим ишлитип, " анаң вә иниң бизниң қолимизда. Немә қилсақ қилалаймиз" дегән. Пәқәт мушу иш үчүн 260 километир йол йүрүп кәлгәнликини әскәртип қойған.

Бу йил 43 яшқа киргән мәмәт тохти, 1980- йилларда хитайдин қечип чиққан болуп, аниси билән дидарлашмиғанға 16 йил болған икән. Һазир канада 450 дин артуқ уйғур яшайду. Хитай уларға болған назарәтни һәрхил йоллар билән ишқа ашурмақта.

Мақалидә ейтилишичә, һазир канадада сиясий панаһлиқ тилигән, илгири хитай әлчиханисида ишлигән бир хитай дипломатниң аяли җяң җаңниң ейтишичә, хитайниң канадада турушлуқ әлчиханиси уйғур, тибәт вә башқа хитайға қарши гуруппиларни көзитип туруш вә материял топлаш үчүн мәхсус бир орган тәсис қилған.

Җяң җаң "мән хитай әлчиханисиниң иплас ишлар билән мәшғул болған әпти бәширисини ачимән. Уларниң ялғанчилиқлирини читқа яйимән " дегән. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт