Robért zoléyk, xitayni dunyawi mesililerde "mes'uliyetchan" rol oynashqa chaqirdi


2006-01-27
Share

Yuqiri derijilik amérika emeldarliri xitayning xelq'aradiki orni uning dunyawi mesililerdiki talash - tartishlar we ikki küch otturisidiki riqabetlerde "mes'uliyetchan" rol oynash yaki oynimasliqigha baghliq ikenlikini bildürdi.

Amérika tashqiy ishlar ministiri kondiliza rayisning tekitlishiche, xitay mesilisi béyjingni amérika we bashqa küchlerning xelq'ara sehnidiki bir shériki, dep étirap qilish yaki iqtisadi menpe'etnila közleydighan bir dölet, dep chüshinishi bilen munasiwetlik iken. U, peyshenbe küni dawus iqtisad munbirining yighinida sözligen téléwizor nutuqida " xitayning bash kötürüshi biz diqqet qilidighan birdin - bir mesile emes. Bu mesilide barliq küchlerning bir mes'uliyiti bar. Bolupmu amérika xitayning mes'uliyetchan shérik ikenliki yaki emeslikini étirap qilishta uning xelq'ara séstimidiki mes'uliyitini ada qilish - qilmasliqi, tinchliq we bixeterlikni ilgiri sürüsh- sürmeslikige qaraydu ' dep tekitlidi.

Fransiye axbarat agéntliqining tekitlishiche, amérika xitaydin néfitke bolghan ishtihasini tizginlep, iran mesiliside b d t xewpsizlik kéngishini heriketlendürüshke tosqunluq qilmasliqni telep qilmaqta. Xitaydiki ziyaritini emdila axirlashturghan amérika mu'awin tashqiy ishlar ministiri robért zoléyk, béyjingda xitay emeldarliri bilen bir qatar muhim uchrishishlarni élip barghandin kéyin, xitayning " iran mesiliside amérika bilen oxshash yolda mangmaydighanliqini" bildürgen. Béyjing iran yadro mesiliside rusiyining pilanigha qiziqidighanliqini bildürmekte. Emma rayis dawus yighinida sözligen nutuqida, xitayni shimaliy koriye 6 dölet söhbitide muhim rol oynidi, dep maxtighan. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet