Moskwa shehiride rus milletchiliri kocha aylinip, heywe körsetti

4-Noyabir küni moskwa shehirining muhim merkiziy kochilirida rus fashistliri marsh éytip, kocha aylinip, rus emes milletlerni rusiyidin qoghlap chiqirishni mezmun qilghan sho'arlarni towlidi. Bu heqte rusiyining xewerler agéntliqi uchur tarqatqan bolup, buninggha texminen ikki mingdin artuq adem qatnashqan.

Rusiyining "moskwa sadasi" radi'osining uchuridin melum bolushiche, namayishchilar dumbaqlirini chélip, " rusiye peqet ruslar üchün"," ruslar algha" dégendek xetler yézilghan lozunkilarni kötürgen, bu marsh éytip méngish sheklidiki pa'aliyetni rusiyining yawro-asiya yashlar ittipaqi dégen teshkilat uyushturghan bolup, buninggha rus fashistlirining " qanunsiz kochmenlerge qarshi turush herikiti", "eslesh", " rusiye qudretlik milliy dölet partiysi" qatarliqlarning ezaliri ishtirak qilghan.

Bu jeryanda mötidil xaraktérge ige " mudapi'e" herikiti dep atalghan teshkilatning ezaliri bilen fashistlar arisida kichik kölemde toqunush chiqqan bolup, saqchilar buni tézlik bilen bésiqturghan. Xewerlerge qarighanda yéqinqi yilardin buyan rusiyide milletchilik küchiyishke qarap yüzlen'gen bolup, rus milletchiliri moskwa qatarliqlar jaylardin rus emes milletlerni jumlidin ottura asiyaliq, kawkazliqlar, xitaylar we bashqa chachliq milletlerni qoghlap chiqirish herikiti élip barmaqta. Bu milletler da'im rus milletchilirining zerbisige uchrap, bulang talang qilinish hetta östürülüsh ehwallirigha duch kelmekte. Bu hal rusiyidiki milliy ziddiyetlerni téximu ötkürleshturmekte. (Ümidwar)