Mongghuliyide siyasi krizis ötkürleshmekte

Mongghuliye parlaménti jüme küni birleshme hökümetni tarqitiwésh yaki saqlap qélish mesilisini munazire qildi. Charshenbe küni mongghuliye xelq inqilabi partiyisidin bolghan ichki kabint ezaliri birleshme hökümettin chékinip chiqqanliqini jakarlighan. Közetküchiler, mongghuliyidiki siyasi krizisni mongghuliyidiki sabiq kommunistlar qozghighan hoquq talishish kürishi, dep körsetmekte.

Jüme küni ulanbaturda bir qanche yüz kishilik namayish ötküzülüp, namayishchilar birleshme hökümet ichki kabintidiki xelq inqilabi partiyisi ezalirining istipadin waz kéchishini telep qildi. Mongghuliye xelq inqilabi partiyisining birleshme hökümet ichki kabintidiki 10 ministir wezipisidin istipa bérip, démokratlar partiyisidin bolghan bash ministir shaxigin élbérgdorji hökümitini qiyin ehwalgha chüshürüp qoyghan.

Namayishchilar jüme küni xelq inqilabi partiyisining bayriqini köydürdi. Xelq inqilabi partiyisi , bash ministir élbérgdorjini namayishni uyushturghan, dep eyibligen. Emma élbérgdorji xelq inqilabi partiyisining tenqidini ret qildi. U, mezkur partiyini oylushup heriket qilishqa chaqirip, " bizning muqimsiz weziyettin alghan yiterlik sawaqlirimiz bar. Men xelq inqilabi partiyisini oylushup ish qilishqa chaqirimen" deydu. Xelq inqilabi partiyisi 1920 - yillardin tartip taki 1990- yillarda sowét ittipaqi tarqalghan'ghiche mongghuliyide hakimiyet sorighan.

Xitay tashqiy ishlar ministirliqi jüme küni mongghuliye weziyiti heqqide bayanat élan qilip, mongghuliye weziyitini yéqindin közitiwatqanliqini bildürdi. Amérika prézidénti ötken yili ulanbaturni ziyaret qilghanda, mongghuliyini asiyada démokratiye yolini talliwalghan ülgilik döletlerning biri, dep maxtighan. (Erkin)