Хитай - японийә мунасивити йәнә җиддийлишишкә башлиди


2006.03.31

Хитай ‏- японийә мунасивити сансаку тақим араллириниң игилик һоқуқи вә японийилик дипломатниң өзини өлтүрүвелиши қатарлиқ вәқәләр сәвәбидин йәнә җиддийлишикә башлиди. Хитай ташқий ишлар министирлиқи җүмә күни японийиниң хитайдики әлчиханисиниң әмәлдарини ташқий ишлар министирлиқиға чақиртип, японийә оттура мәктәб дәрслик китабида хитайлар дявйүйтәй, дәп атайдиған сансаку тақим араллирини японийә земини қилип көрсәткәнликигә наразилиқ билдүрди.

Хитай ташқий ишлар министирлиқи әмәлдари чю гохуң, японийә әлчиханисиниң әмәлдари хидехиса хориночиға, дявйүйтәй тарихтин бери җуңгониң бир қисими икәнлики вә бу мәсилә җуңго - японийә оттурисидики игилик һоқуқ мәсилиси икәнликини билдүргән. Чю гоҗоң, " бу мәсилидә бир тәрәплимилик һәрикәт қоллиниш қанунсиз вә инавәтсиз " дәйду. Шу күни хитай ташқий ишлар министирлиқи шаңхәйдә турушлуқ японийә консулханисидики бир дипломатниң өзини өлтүрүвелиш вәқәси тоғрисида японийә әмәлдарлирини җуңгоға "асассиз һуҗум қилиш" билән әйиблиди.

Хитай ташқий ишлар министирлиқи баянатчиси чин гаң" бизниң тәкшүрүшимизчә җуңго һөкүмәт хадимлириниң өзини өлтүривалғучини өлүвелишқа мәҗбурлаш әһвали йүз бәргән әмәс " дәп көрсәтти. У, хитайниң виәнна әһдинамисиға хилаплиқ қилғанлиқини рәт қилған. Лекин японийә ички кабинт секритари шинзо абе, җүмә күни мухбирларға " шаңхәй дөләт хәвпсизлик даирилири японийә консулхана хадимиға рәһимсизләрчә тәһдит салған вә қорқутқан, лекин бу уни баш әгдүрәлмигән. У, тәһдитләр алдида дөлити үчүн өз һаятини тәқдим қилған " дәп җакарлиди.

японийиниң шаңхәйдики консулханисида ишләйдиған бир хадими 2004 - йили 5 - айда өзини өлтүрүвалған. У вәсийәтнамисида, шаңхәйлик қиз дости билән болған мунасивити сәвәбидин хитай дөләт бихәтәрлик хадимлириниң бесимиға учриғанлиқини илгири сүргән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.