Америка ахбарат әмәлдари: хитайда өктичи күчләрни бастуруш муқимсизлиқ амиллирини күчәйтмәктә

2006-02-03
Елхәт
Пикир
Share
Принт

Америка дөләтлик ахбарат идарисиниң мудири җон нигрипонти, хитайда өктичи күчләрниң бастурулуши дөләт муқимлиқиға еғир дәриҗидә тәсир йәткүзүп, униң ташқи сияситигә тәсир қилмақта, деди.

Нигрипонти пәйшәнбә күни америка дөләт мәҗлисидә гуваһлиқ бәргәндә, " хитайниң баш көтүрүп дуняви қудрәтлик дөләтләр қатаридин орун елиши сестимилиқ бир мәсилә болуши мүмкин. Бирақ компартийиниң пуқраларға сияси әркинлик беришни рәт қилиши бу қәдәмни кечиктүрмәктә' дәп көрсәтти. Униң әскәртишичә, җуңго дуч келиватқан әң чоң риқабәт иқтисади тәрәққиятниң үзлүксизликини сақлаш, пуқраларға хизмәт тепип бериш вә йеза - кәнтләрниң наразилиқини бесиш икән. У мундақ дәйду": хитай буниң үчүн иқтисад, әдлийә, маарип, муһит сестимиси вәхиянәтчилик қатарлиқ бир қатар мәсилиләрни һәл қилиши керәк "

Буниңдин сәл илгири америка ташқий ишлар министирлиқиниң мәслиһәтчиси җеймис кәйс, җуңго - америка иқтисад вә бихәтәрлик көзитиш комитетиниң йиғинида, " хитайниң иқтисади мөҗизиси муһит вә аммиви саламәтлик җәһәттә юқири бәдәл төләшни тәләп қилипла қалмай, иҗтимаий вә әхлақий қиммәт җәһәттиму зор йоқитиш елип кәлди" дәп тәкитлигән. Җеймис кәйсниң әскәртишичә,хитай өз хәлқиниң йошурун күчини толуқ ишқа салмиғичә,охшимиған пикирләргә йол қоймиғичә улар өз мәқсидигә йетәлмәйдикән.

Җон нигрипонтиниң тәкитлишичә, җуңго иқтисади вә ташқи содисиниң тәрәққияти " бейҗиңниң ташқи дунядики сияси тәсирини күчәйтип, һәрбий ишлардики заманивийлишиш қәдимини тезләтмәктә " у, хитай шәрқий - җәнубий асия вә оттура асияда иқтисади вә сияси тәсирини тикләп, " бу районларда хитайниң баш көтиришигә қарши туридиған дөләтләрниң оттуриға чиқишидин сақланмақта " дәйду. (Әркин)

Пикирләр (0)
Share
Толуқ бәт