Amérika axbarat emeldari: xitayda öktichi küchlerni basturush muqimsizliq amillirini kücheytmekte

Amérika döletlik axbarat idarisining mudiri jon nigriponti, xitayda öktichi küchlerning basturulushi dölet muqimliqigha éghir derijide tesir yetküzüp, uning tashqi siyasitige tesir qilmaqta, dédi.

Nigriponti peyshenbe küni amérika dölet mejliside guwahliq bergende, " xitayning bash kötürüp dunyawi qudretlik döletler qataridin orun élishi séstimiliq bir mesile bolushi mümkin. Biraq kompartiyining puqralargha siyasi erkinlik bérishni ret qilishi bu qedemni kéchiktürmekte' dep körsetti. Uning eskertishiche, junggo duch kéliwatqan eng chong riqabet iqtisadi tereqqiyatning üzlüksizlikini saqlash, puqralargha xizmet tépip bérish we yéza - kentlerning naraziliqini bésish iken. U mundaq deydu": xitay buning üchün iqtisad, edliye, ma'arip, muhit séstimisi wexiyanetchilik qatarliq bir qatar mesililerni hel qilishi kérek "

Buningdin sel ilgiri amérika tashqiy ishlar ministirliqining meslihetchisi jéymis keys, junggo - amérika iqtisad we bixeterlik közitish komitétining yighinida, " xitayning iqtisadi möjizisi muhit we ammiwi salametlik jehette yuqiri bedel töleshni telep qilipla qalmay, ijtima'iy we exlaqiy qimmet jehettimu zor yoqitish élip keldi" dep tekitligen. Jéymis keysning eskertishiche,xitay öz xelqining yoshurun küchini toluq ishqa salmighiche,oxshimighan pikirlerge yol qoymighiche ular öz meqsidige yételmeydiken.

Jon nigripontining tekitlishiche, junggo iqtisadi we tashqi sodisining tereqqiyati " béyjingning tashqi dunyadiki siyasi tesirini kücheytip, herbiy ishlardiki zamaniwiylishish qedimini tézletmekte " u, xitay sherqiy - jenubiy asiya we ottura asiyada iqtisadi we siyasi tesirini tiklep, " bu rayonlarda xitayning bash kötirishige qarshi turidighan döletlerning otturigha chiqishidin saqlanmaqta " deydu. (Erkin)