Мушәррәп һәрбий һаләтни бикар қилишни рәт қилди


2007.11.11

Пакистан президенти пәрвиз мушәррәп бир һәптидин буян давамлишиватқан һәрбий һаләтни бикар қилмайдиғанлиқини билдүрди.

Б б с агентлиқиниң учурлириға асасланғанда, мушәррәп, йеқинқи бир қанчә күн ичидә пакистанниң өлкилик вә дөләтлик парламентлирини тарқитиветип, келәр йили 9 - январда парламент сайлими елип баридиғанлиқини җакарлиған һәмдә өзиниңму чоқум һәрбий салаһийити билән әмәс бәлки, пуқра сүпитидә президентлиқ қәсими беридиғанлиқини тәкитлигән болсиму, лекин у буниң үчүн алий сотниң йеқинда өзи һәққидә елан қилған бәлгилимисини бикар қилғандин кейинла шундақ қилидиғанлиқини билдүргән.

Пәрвиз мушәррәп америка вә хәлқара җәмийәтниң тәнқидигә қаримай, бир һәптидин буян өзигә қарши чиққан өктичиләрниң наразилиқ намайишлирини тинҗитқандин сирт йәнә көплигән адәмләрни тутқун қилған иди, америка һөкүмити униң һәрбий вәзиписидин истипа беришини һәмдә һәрбий һаләтни бикар қилишини, өзиниң һәрбий вәзиписидин қелип, президентлиқ вәзиписини атқуруш вәдисини ақлишини тәләп қилған иди.

У йәнә йеқинда қайтип кәлгән сабиқ баш министир бутто ханимниму контроллуқ астиға алған. Әмма, бинәзәр бутто ханим йәкшәнбә күни пакистанниң чоң шәһәрлиридин бири лаһорға келип, сәйшәнбә күни өткүзүлидиған кәң көләмлик намайишқа қатнишидикән. Намайишчилар лаһордин ислам абадқа йүрүш қилидикән.

Пакистандики бу җиддийлик буниңдин бир қанчә ай илгири йүз бәргән лал мәсчит вәқәсидин кейин техиму күчәйгән болуп, илгири исламий радикал гуруппилар униңға қарши чиққан болса, мана әмди у пүтүн мәмликәттики һәр саһәгә мәнсуп кишиләрниңму наразилиқлирини қозғиған икән. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.