Косовоға мустәқиллиқ йоли көрүнди


2007.01.26
Share on WhatsApp
Share on WhatsApp

"Вашингтон почта" гезити, америка вә явропа әллириниң NATO қисимлири 1999 -йили косовада елип барған һәрбий һәрикәттин кейин, б д т вакалитән башқуруватқан косованиң мустәқиллиқини қоллашни қарар қилғанлиқини хәвәр қилди.

"Вашингтон почта" гезитиниң әскәртишичә, юқири дәриҗилик америка вә явропа әмәлдарлири америка билән явропадики иттипақдаш дөләтләр косованиң хәлқара җәмийәт назарити астида сербийидин айрилип чиқишини қоллашни қарар қилғанлиқини билдүргән.

Гезиттә, бу қарар бу йил язғичә шәрқий - җәнубий явропада б д т ға әза йеңи бир дөләтниң туғулушидин дерәк беридиғанлиқини язди. Бу пилан бойичә NATO қисимлири косова таки явропа иттипақи вә NATO ға әза шәрт-шараитини һазирлиғичә бу дөләттә давамлиқ тәртип сақлаш вәзиписини үстигә алиду.

Сербийиликләр косованиң мустәқил болушиға қәти қарши турмақта вә русийиниң хәвпсизлик кеңишидә рәт авази қоллунишини үмид қилмақта. Күзәткүчиләрниң әскәртишичә, хитай өзидики миллий мәсилиләр түпәйли косова мустәқиллиқини қоллимайдиған дөләтләрниң бири. Хитай әйни чағда NATO ниң косовадики һәрбий һәрикитигә қарши чиққан шундақла хитайниң белградтики баш әлчиханиси "сәвәнлик" билән бомбардиман қилинған иди.

Албанийә 2005 - йили гүәнтанамодин қоюп берилгән 5 нәпәр уйғур мусапириға паналиқ һоқуқи бәргәндә хитай албанийигә, әгәр бу 5 нәпәр уйғурни хитайға қайтуруп бәрмисә, б д т хәвпсизлик кеңишидә косова албанлириға қарши биләт ташлайдиғанлиқини агаһландурған. Лекин албанийә хитайниң тәлипини рәт қилди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.