Kosowogha musteqilliq yoli köründi

"Washin'gton pochta" géziti, amérika we yawropa ellirining NATO qisimliri 1999 -yili kosowada élip barghan herbiy herikettin kéyin, b d t wakaliten bashquruwatqan kosowaning musteqilliqini qollashni qarar qilghanliqini xewer qildi.

"Washin'gton pochta" gézitining eskertishiche, yuqiri derijilik amérika we yawropa emeldarliri amérika bilen yawropadiki ittipaqdash döletler kosowaning xelq'ara jem'iyet nazariti astida sérbiyidin ayrilip chiqishini qollashni qarar qilghanliqini bildürgen.

Gézitte, bu qarar bu yil yazghiche sherqiy - jenubiy yawropada b d t gha eza yéngi bir döletning tughulushidin dérek béridighanliqini yazdi. Bu pilan boyiche NATO qisimliri kosowa taki yawropa ittipaqi we NATO gha eza shert-shara'itini hazirlighiche bu dölette dawamliq tertip saqlash wezipisini üstige alidu.

Sérbiyilikler kosowaning musteqil bolushigha qet'i qarshi turmaqta we rusiyining xewpsizlik kéngishide ret awazi qollunishini ümid qilmaqta. Küzetküchilerning eskertishiche, xitay özidiki milliy mesililer tüpeyli kosowa musteqilliqini qollimaydighan döletlerning biri. Xitay eyni chaghda NATO ning kosowadiki herbiy herikitige qarshi chiqqan shundaqla xitayning bélgradtiki bash elchixanisi "sewenlik" bilen bombardiman qilin'ghan idi.

Albaniye 2005 - yili gü'entanamodin qoyup bérilgen 5 neper Uyghur musapirigha panaliq hoquqi bergende xitay albaniyige, eger bu 5 neper Uyghurni xitaygha qayturup bermise, b d t xewpsizlik kéngishide kosowa albanlirigha qarshi bilet tashlaydighanliqini agahlandurghan. Lékin albaniye xitayning telipini ret qildi. (Erkin)